Renatu Sanshesh va yana 13 nafar «tilla bola». «Bavariya» vakili Renatu Sanshesh Golden Boy sovrinining 14-laureatiga aylandi. E'tiborlisi, u Evropada eng yaxshi yosh futbolchiga topshiriladigan sovrinni yutgan birinchi portugaliyalik bo'ldi. Soccer.ru sayti shu munosabat bilan Renatuni alohida tabriklagan holda, avvalgi laureatlarga nigoh tashlab, nufuzli sovrin ularning keyingi futbolchilik taqdirlariga qanday ta'sir qilganini ko'rib chiqdi. Eslatish joiz,  Golden Boy mukofoti 2003 yili Italiyaning Tuttosport nashri tomonidan ta'sis etilgan. U shundan buyon har mavsum yakuniga ko'ra, topshirib kelinmoqda. Individual sovringa Evropa milliy chempionatlarining oliy divizionida to'p suruvchi 21 yoshdan kichik futbolchilar da'vogarlik qilishlari mumkin. Ha, «Tilla bola» maqomiga erishgan yigitlarning keyinchalik nimalarga erishganlari ko'pchilikni qiziqtirishi tayin. Axir laureatlarning eng kattasi hozirda 33 yoshni qarshilashga ulgurdi. 2003 yil - Rafael van der Vart («Ayaks»; Gollandiya) Obro'li sovrinning birinchi sohibi sifatida gollandiyalik Rafael van der Vart tanlandi. U o'sha payt 20 yoshda edi va «Ayaks»da asosiy xavbek maqomida to'p surardi. Umuman, aynan mavsum-2002|2003 Rafael uchun butun faoliyati davomidagi eng sermahsuli bo'lib qoldi. Xullas, Italiya nashri uning barcha turnirlarda Amsterdam klubi uchun  naq 22ta gol urganini asos qilib olgandi. Birinchi «Tilla bola» yana 2 yilcha eredivizionda ushlanib turdi va shundan so'ng «Gamburg» safiga qo'shildi. «Real» tarkibida o'tgan ikki mavsum esa, uning uchun faoliyati cho'qqisi bo'ldi. Rafael «Qirollik klubi» bilan xayrlashgach, «Tottenxem»da ham 2 yil munosib o'ynadi. Keyin o'yinida pasayish boshlandi va «Gamburg»ga qaytdi, biroq bundesligada doimiy ravishda jarohatlardan pand edi va ortga chekinishi davom etdi. Hozirda 33 yoshli golland Daniyaning «Midtyulland» jamoasi sharafini himoya qilyapti. U - JCh-2010 kumush medali va Evro-2004 «bronza»si sohibi. Xulosa. Ushbu «Tilla bola»dan taniqli futbolchi chiqdi. Faqat, bir narsani qo'shimcha qilish lozim, o'sha mavsum ekspertlar negadir Krishtianu Ronalduga e'tibor qaratishmagandi. 2004 yil - Ueyn Runi («Everton»|«MYu»; Angliya) Ikkinchi laureat Ueyn Runiga nisbatan ham xuddi shu gaplarni takrorlash mumkin. To'g'ri, u ayni payt ma'lum muammolar girdobida, lekin futbol tarixiga yorqin iz bosish uddasidan chiqdi. Ingliz hujumchisi o'sha 2004 yiliyoq Evropa chempionatidagi o'yinlari orqali butun dunyoga ovoza bo'ldi va «Everton»dan «Manchester Yunayted»ga o'tdi. Runi shuningdek, keyinchalik «Oltin to'p» da'vogarlari ro'yxatiga tushdi, Angliya milliy jamoasi tarixidagi eng yaxshi to'purarga aylandi va APLning barcha davrlardagi goleadorlari reytingida 2-o'ringa ko'tarildi (undan oldinda birgina Alan Shirer bor). Qolaversa, «Shrek» yana 3tagina gol ursa, afsonaviy  Bobbi Charltonga etib, «Manchester Yunayted» tarixidagi eng sermahsul futbolchi maqomini oladi. Xulosa. Ueyn Runi chindan ham, «Tilla bola» ekanligini isbotladi. 2005 yil - Lionel Messi («Barselona»; Argentina) Tuttosport 2015 yili Golden Boyga munosib yigitni topishda sira adashmadi. Ya'ni italyanlar uchinchi urinishda nishonni mutlaqo bexato urishdi. Vaholanki, Leo o'sha payt gol «muhrlash»ni hali sanoat konveyri darajasiga olib chiqqan emasdi. Deylik, mavsum-2004|2015 davomida «Barselona»ning 17ta o'yinida ishtirok etib, atigi 4ta gol bilan kifoyalangandi. Qolaversa, bor-yo'g'i 18 yoshli o'spirin edi. Keyinchalik hammasi qanday tus olgani esa barchaga ma'lum! Xulosa. 3-raqamli «Tilla bola» «Oltin to'p»ning 5 karra sohibiga aylandi va bu ehtimolki, hali chegara emas. Ortiqcha gapga o'rin ham yo'q. 2006 yil - Sesk Fabregas («Arsenal»; Ispaniya) Sesk Fabregas yuqori darajadagi to'laqonli ikkinchi mavsumi yakunida sovringa munosib topildi. Kataloniyalik yigit o'shandayoq «Arsenal» yarim himoyasida «ob-havo»ni belgilab berishni boshlagan, biroq asosiy yutuqlari hali oldinda edi. Sesk keyinchalik Ispaniya milliy jamoasi bilan jahon chempioni bo'ldi, shuningdek, Evropa birinchiligida 2 marta zafar quchdi. Klub miqyosida esa, jonajon jamoasi - «Barselona»ga qaytib, bir qator sovrinlarga ega chiqdi va yana Angliyaga yo'l olib, «Chelsi» safida chempionlik gashtini surdi. Unga bitta natija etishmayapti - Chempionlar Ligasidagi g'alaba, lekin buning uchun hali imkoniyati yo'q emas. Zero, Fabregas hozir 29 yoshda va hali yana 3-4 yil yuqori saviyada o'ynasa kerak. Xulosa. Fabregas ham Italiya nashrini uyaltirmay, «Tilla bola» nomiga munosib o'ynadi. 2007 yil - Serxio Aguero («Atletiko»; Argentina) Aguero «Atletiko» tarkibidagi birinchi mavsumidan so'ng Golden Boy sohibiga aylandi, garchi o'shanda atigi 7ta golga mualliflik qilgan bo'lsada. Muhimi, argentinalik hujumchi bu avansni keyinchalik to'la oqladi.  Ya'ni Madridda o'tgan samarali 5 yildan so'ng «Manchester Siti» safini to'ldirgan «Kun» Angliyada ham o'ziga xos samaradorlikni saqlab qoldi. Xususan, bitta mavsumga bog'liq shaxsiy rekordini 30ta gol marrasiga etkazdi va haqli ravishda zamonaviy futboldagi eng yaxshi hujumchilardan biri maqomini oldi. Davomi interfutbol.uz saytida.
— deya xabar beradi uff.uz nashri.