Agar Polsha termasi Evro-2016ga asosan sermahsul o'yini evaziga yo'l olgan bo'lsa, ruminiyaliklar mustahkam himoya hisobiga oliy maqsadga erishdilar. E'tibor bering, Polsha va Ukraina maydonlarida bo'lib o'tgan qit'a chempionatini o'tkazib yuborgan Ruminiya milliy jamoasi butun saralash davomida atigi 2ta gol qo'yib yubordi. Xullas, ruminiyaliklar general Angel Iordanesku o'rnatgan tartibli o'yin natijasida saralashni mag'lubiyatsiz tugatishdi, xuddi Angliya, Italiya va Avstriya termalari kabi.
Frantsiyani 2 bora zabt etgan general
General Iordanesku (u harbiy unvonni armiya klubi - «Styaua»da ishlagan payti olgan) Ruminiya termasini ilk marta boshqarganida, shogirdlari bilan JCh-98 saralash bosqichini omadli bosib o'tgandi. Iordaneskudan so'ng jamoani Viktor Pitsurke qabul qilib oldi. U sotsialistik tuzum payti qimor o'yinlaridagi ishtiroki sabab, rumin qamoqxonasida o'tirib chiqqan, ammo keyinchalik «Styaua»dagi xizmatlari evaziga polkovnik unvonini olgandi. Iordanesku esa keyinchalik milliy jamoaga yana 2 marta qaytdi. Birinchisida ruminlarni Evro-2004 final raundiga olib chiqishga urindi, ammo nafaqat o'sha turnir saralashi, balki JCh-2006 yo'lidagi ilk o'yinlarda ham omadsizlikka uchradi. 2007
yili general futbol qo'mondoni sifatida iste'foga chiqqandek ko'rindi. Aniqroq aytsak, sotsial-demokratlar partiyasidan parlamentga saylangan Angel bobo naq 7 yil siyosat bilan shug'ullandi. 2014 yilga kelib esa, iste'fodagi generalni yana futbol xizmatiga safarbar etishdi. Natijada u ikkinchi marta Frantsiyani zabt etdi. To'g'rirog'i, shu mamlakatda o'tadigan yirik turnirga yana yo'l ochdi.
9 nafar ishsiz
Ruminlar oxirgi saralash kampaniyasini Pitsurke rahbarligida boshlashdi, biroq bu murabbiy 3-o'yindan so'ng ishdan ketdi. Yo'q, salbiy natijalar sabab emas. Zero, ruminlar uning boshqaruvida 9 imkoniyatdan 7 ochko to'plashgandi. Shunchaki, Pitsurke Saudiya Arabistonining «Al-Ittihod» klubidan o'ta manfaatli taklif oldi. Natijada qariya Iordanesku o'tgan yilning oktyabrida bir yillik kelishuv asosida ish boshladi. O'sha vaqt Ruminiya futbolining umumiy holati o'ta tahlikali edi. Deylik, Iordaneskuning ilk ro'yxatiga tushgan 25 nafar futbolchidan naq 9 nafari ishsiz yurgandi. Ya'ni hech qanday klub bilan shartnomaga ega emasdi. «Bunaqasini tasavvur qilish ham qiyin, ammo biz terma jamoaga ishsiz futbolchilarni jalb etishga majburmiz», - deya noligandi Iordanesku.
- Boz ustiga, 18 nafar o'yinchini xorijdan chaqiryapmiz. Hech qachon mahalliy va legioner futbolchilarimiz o'rtasida bunchalik katta farq sezilgan emasdi». Murabbiy o'sha payt Ruminiya klub futboli orqaga  ketganini ro'y-rost aytgandi: «Bu erda 11 yil oldin ishlagandim. O'shanda bizning futbolchilar evrokuboklardan bunchalik erta chiqib ketmasdilar. Bugungi kunda esa Ruminiya termasi asosini katta ligalarning kichik klublarida o'rtamiyona yoki zaxirachi hisoblangan futbolchilar tashkil etishmoqda...». Lekin o'tgan yili ruminlar milliy jamoasi naq 3 oy davomida FIFA reytingida kuchli 10talik qatorida ushlanib turdi. Iordanesku boshqaruvida esa jamoa hattoki, 7-o'ringa ham ko'tarildi (oxirgi 18 yildagi eng yaxshi natija).
To'g'ri, ruminlar keyinchalik nisbatan pastga tushishdi va hozir 13-qatorda qayd etilishgan. E'tiborli jihat, ruminlar 2014 yilning iyun oyidan buyon mag'lubiyat nimaligini bilishmayapti. O'shanda jamoa Jazoirga qarshi o'rtoqlik bahsini boy bergandi.
Davomi InterFUTBOL gazetasi blogida.
— deya xabar beradi uff.uz nashri.