Oliy Liga so'nggi, 30-turidan o'rin olgan “Nasaf” – “Mash'al” (2:0) uchrashuvi yakuniga etkach, “Mash'al” jamoasi boshlig'i Dilyaver Vaniev o'yin haqidagi fikrlari bilan o'rtoqlashdi. “O'yin haqida gapirishdan avval, bir quvonarli holni ta'kidlab o'tmoqchiman. Bugungi uchrashuvda har ikkala jamoa safida ham “Mash'al” akademiyasida tarbiya topgan o'yinchilar to'p tepishdi. Bunday o'yinchilar bilan qanchalik faxrlansak arziydi. Ayniqsa “Nasaf” safida to'p tepayotgan akademiyamiz tarbiyalanuvchilari va sobiq futbolchilarimizning bugungi ko'rsatgan o'yini juda mazmunli bo'ldi. To'g'risi, biz bulardan faxrlanamiz. Klubimiz bundan buyon ham mana shunday futbolchilarni o'zbek futboli uchun tarbiyalab voyaga etkazishdagi ishlarini davom ettiraveradi.   Endi o'yin haqida to'xtaladigan bo'lsam, chempionatning so'nggi uchrashuvi bo'lishiga qaramasdan futbolchilar bugun tezkor bo'lishdi. Ikki printsipial raqib maydonda kurash olib bordi. Jamoamizda ko'plab yo'qotishlar bo'lishiga qaramasdan bugun maqsadimiz g'alaba qozonish edi. Afsuski maqsadimiz amalga oshmadi. Qolaversa, bizga nisbatan “Nasaf” jamoasi g'alabaga munosib o'yin ko'rsatdi. So'zimni so'ngida “Nasaf” jamoasini bu yilgi erishgan yutug'i – bronza medalini qo'lga kiritgani bilan tabriklayman. O'zbekiston Kubogi finalida esa ularga omad tilaymiz”, – deydi Dilyaver Vaniev. 
— deya xabar beradi uff.uz nashri.