Ma'lumki, 2015 yili FIFA atrofida ajabtovur mashmashalar ro'y bergach, tashkilot rahbariyatida keskin o'zgarishlar kuzatildi. Xususan, Janni Infantino FIFA prezidenti lavozimini egalladi. U saylov kampaniyasi davomida, shuningdek, boshqaruv mas'uliyatini o'z zimmasiga olar chog'ida dunyo futbolining rivojiga yo'naltirilgan o'z dasturi asosan, jahon chempionatining hozirgi formatini o'zgartirib, ishtirokchilar sonini oshirishga, bu orqali futbolni yanada ommalashtirishga qaratilganini ta'kidlagandi. Tashkilot rahbari sentyabr oyidagi chiqishlaridan birida mundialdagi ishtirokchilar sonini 40taga oshirish mumkinligini takrorlab, istak juda kuchli bo'lsa, bu ko'rsatkichni hatto 48taga ham etkazish mumkinligini aytdi. Keling, endi bu va'dalar va uning ostida nimalar yotganini, ishtirokchilar soni oshirilishining terma jamoamizga qanday ta'sir qilishi haqida fikr yuritamiz... Avvalambor, ochig'ini aytish kerak, zamonaviy futbol olami uchun JCh ishtirokchilari sonining oshirilishi unchalik ahamiyatli emas. Negaki, shundoq ham deyarli hech bir futbol federatsiyasi mundial saralashidan chetda qolmayapti. Deylik, FIFAga a'zo federatsiyalarning umumiy soni hozirgi paytda 208 nafarni tashkil qiladi. Braziliyada o'tgan 2014 yilgi JCh saralashida esa ana shu a'zolarning 203tasi bevosita saralash turnirlarida o'z omadlarini sinab ko'rishdi. Tabiiyki, mezbon - Braziliya saralashdan ozod qilingan. Butan, Guam va Mavritaniya FFlari o'z istaklari bilan saralashda qatnashishmadi. Yana bir chetda qolgan federatsiya - Bruney esa o'sha vaqtlari FIFA sanktsiyasi tufayli o'yinni o'tkazib yuborgan. Xullas, tashkilot ro'yxatidagi barcha federatsiyalar mundial uchun qo'llaridan kelgancha harakat qilishdi. Ilgarilari, FIFA yangi tashkil etilgan paytlarda moliyaviy muammolarga duch kelavergani uchun badavlat davlatlar va ularning FFlari e'tiborini o'ziga qaratishga majbur bo'lgandi (masalan, Angliya faqat 1950 yilga kelibgina tashkilotga a'zo bo'lgan). Hozirgi FIFA esa aslo «qo'li kalta» idora emas. Bordi-yu, ishtirokchilar soni 48 jamoaga etkazilsa ham, aftidan, bu qit'alararo taqsimotdagi adolatsizlikni yo'qotish uchun amalga oshiriladi. Ya'ni, bizningcha, bu holatda paydo bo'lgan yangi kvotalar Evropa qit'asi emas, Osiyo, Afrika va Okeaniya mintaqalari o'rtasida taqsimlanadi. Demak, 47ta a'zosi bor OFKga hozirgidek, 4}1 emas-u, naqd 6ta o'rin ajratiladi. Albatta, bu - biz uchun ayni muddao. Negaki, terma jamoamizda (biz uchun hozircha orzu bo'lib kelayotgan) mundialda ishtirok etish uchun yaxshigina imkoniyat hosil bo'ladi. Lekin «tanganing ikkinchi tomoni»da yana bir masala bor: deylik, qatarda o'tadigan mundialda Fiji, Taiti yoxud Solomon orollari terma jamoalarini ko'rishni chindan ham istaysizmi?! Davomi interfutbol.uz saytida.
— deya xabar beradi uff.uz nashri.