Jahon futbolining buyuk namoyandasi Lionel Messi navbatdagi intervyusida Luis Enrikening «Barselona»si Xosep Gvardiola tuzgan o'sha qoyilmaqom jamoadan nimasi bilan farqlanishiga to'xtaldi. Argentinalik yulduz shuningdek, hattoki, «poker» qayd etish imkoniyatiga ega bo'lsada, penalti tepish huquqini qaysidir jamoadoshiga muammosiz berishi sababini ham aytib o'tdi. Leo Messi tomonidan Angliya jamoalari darvozasiga urilgan birinchi gol uning qalbida alohida o'ringa ega. Zero, argentinalik hujumchi inglizlarga ilk golini 2009 yili ChL final o'yinida «tortiq» etgandi. Rim shahrida o'tkazilgan o'sha hal qiluvchi bahsda «Barselona» Aleks Fergyuson boshqaruvidagi «Manchester Yunayted»ni dog'da qoldirgan. O'zlarini etuk ekspertdek tutadigan ko'plab mutaxassislar o'sha vaqt futbolchining saviyasiga shubha bilan qarashgani rost. Ha, ayrimlar hamon o'z fikrlaridan qaytishmagan ham. Vaholanki, aksariyat muxlislar, soha bilimdonlari va futbolchilarning o'zlari Messining o'yin tarixidagi eng yaxshi ijrochi ekanligini allaqachon ochiqchasiga tan olib ulgurishdi. Shuning barobarida odatga ko'ra, argentinalik barcha sovrinlarni bitta klubda qo'lga kiritganiyu, boshqa jamoada qanday o'ynashi mavhumligi bot-bot tilga olinadi. Xususan, Messining APLda xuddi Ispaniyadagi kabi mahsuldorlik qayd etishi shubha ostiga qo'yiladi. Lekin bitta fakt shuki, Lionel Evropa Chempionlar Ligasi doirasida Angliya premer-ligasining elit ishtirokchilariga qarshi etarlicha o'ynagan va ularda o'zini sira yo'qotib qo'ymagan. Messining APL klubi darvozasini birinchi marta 2009 yili nishonga olganini yuqorida aytdik. O'shanda argentinalik dahocha Xavining to'p uzatishidan foydalangandi. U shundan buyon ingliz jamoalariga qarshi bahslarda urgan gollari sonini 17taga etkazdi. Boshqa hech bir liga vakillari (albatta, La-liga klublaridan tashqari) Leodan bunchalik ko'p jabr chekishmagan. Misol uchun, Messi joriy ChLda «Manchester Siti» darvozasini naq 4 marta ishg'ol qildi. - So'nggi vaqtlarda shunday fikrlar yangrayaptiki, hozirgi «Barselona» hattoki, Xosep Gvardiola tuzgan o'sha engilmas jamoadan ham kuchli ekan. Chin etakchi sifatida ikki davrga taalluqli ikki jamoa o'rtasidagi farqni ayta olasizmi? - Aslida «Barselona» tizimi qandayligi ko'pchilikka ma'lum. Jamoamizning yagona falsafaga tayanishi ham birovga sir emas. «Barsa» bu masalada jahon futbolidagi sanoqli klublardan biridir. Biroq har bir murabbiy o'ziga xos qarashlarga ega va ish joyida ularni amalga tatbiq etishni xohlaydi. Shuning natijasida uslub salgina boshqacha ko'rinishi mumkin. Shaxsan o'zimiz Gvardiola va Enrike falsafasidagi o'yinlar o'rtasida katta o'zgarishlarni sezayotganimiz yo'q. Lekin ba'zi farqli jihatlar bor, baribir. Misol uchun, Enrike qo'l ostida ozgina tajovuzroq harakatlanishni o'rgandik. Bu ayniqsa, qarshi hujumga o'tganimizda bilinyapti. Harqalay, Gvardiola davrida qarshi hamla uslubidan kamroq foydalanardik. - «Ko'k-anorrang» tusli futbolkadagi qaysi o'yinlar siz uchun alohida ahamiyat kasb etadi? ChLning 2ta g'alabali finali - avval Rim, keyin «Uembli»da «MYu» darvozasiga 2ta gol urganingiz faoliyatingiz davomidagi buyuk lahzalar qatoriga kirsa kerak. Shundaymi? - O'sha vaqtlar Xosep Gvardiola tuzgan «mashina» aql bovar qilmas darajada ko'p sovrin yiqqandi. Qarang, biz 4ta mavsum davomida imkoni bor 19ta sovrindan 14tasiga ega chiqqanmiz. Shunga yarasha, bir qator o'yinlar borki, ularda misli ko'rilmagan futbol namoyish etganmiz va raqibda bizga qandaydir qarshilik ko'rsatish uchun ozgina imkoniyat ham tug'ilmagan. E'tiborlisi, bunday holat deyarli har safar katta, ya'ni jiddiy bahslarda kuzatilgan. Shubhasiz, Rimda tashkillashtirilgan ChL finalini ham shunday o'yinlardan biri sifatida ta'riflash mumkin. «Barsa» o'shanda chindan ham, ideal futbol namoyish qilgandi. - Aytingchi, Angliya klubi darvozasini nihoyat, ilk marta ishg'ol qilganingizda qandaydir engillikni his etganmisiz? - Ochig'i, o'sha vaqtdagi ehtirosimni ta'riflab berolmayman. Umuman, har bir muhim o'yinda gol urganingda, beixtiyor engil tortasan. Axir futbolda jamoang muxlislari va sheriklaringga xursandchilik ulashishdan yaxshiroq lahza bormi? Xullas, bunday vaqtda chinakamiga rohatlanasan. Qaytaraman, buni so'zlar yordamida to'liq ifodalab berishim mushkul. - Ma'lumki, «Manchester Siti» superyulduzi - Serxio Aguero eng yaqin do'stlaringizdan biri. 2 yil oldin tumanli o'lkadan Ispaniyaga ko'chib o'tgan Luis Suares bilan ham juda qalinsiz. Ularni o'zaro taqqoslay olasizmi? Davomi interfutbol.uz saytida.
— deya xabar beradi uff.uz nashri.