"Barselona" rahbariyati jamoa hujumchisi Lionel Messi bilan yangi shartnoma imzolashga astoydil ahd qilgan.
Kataloniyaliklar rahbariyatining so'nggi yig'ilishida aynan shu narsa asosiy maqsad qilib olindi. Klub prezidenti Jozep Bartomeu bu borada Lionel Messining otasi Xorxe Messiga qo'ng'iroq qilishga ham ulgurgan.
Xorxe Messi "Real"ga qarshi kechadigan klasiko bahsini stadionda tomosha qiladi va shundan so'ng tomonlar muzokaraning dastlabki bosqichini boshlaydilar. Kataloniyaliklar Messini faoliyatining oxiriga qadar davom etadigan shartnoma taklif qilishni maqsad qilishgan.
Klub buning uchun barcha moliyaviy imkoniyatlardan foydalanmoqchi. Bartomeu muzokaralar davomida "Barselona"ning rivojlanish yo'lini tushuntirib o'tmoqchi va bunda argentinalik futbolchi asosiy o'rin tutishini ta'kidlamoqchi.
Xabar qilinishicha, har ikki tomon ham yangi shartnoma borasida ijobiy fikrda. Ammo Messi hozircha yakuniy qaror qabul qilmadi. Eslatib o'tamiz, u bir necha bor faoliyatini bolalik klubi - "Nyuelss Old Boyz"da yakunlash niyatini bildirgan edi.
— deya xabar beradi uff.uz nashri.