O'zbekiston milliy jamoasining Janubiy Koreya termasiga imkoniyatni boy berishini kutilmagan holat, deb bo'lmaydi. Chunki ushbu raqib har doim favorit hisoblangan. Unga qarshi kechgan o'yinlardagi birinchi va baxtga qarshi, hozircha oxirgisi bo'lib turgan g'alaba uzoq 1994 yilda qo'lga kiritilgan. Shundan buyon qancha o'yin o'tkazilmasin, hech birida uch ochkoga erisholmadik. Bundan ko'rinadiki, har safar mag'lubiyatdan qalbda chandiq qoladi. Navbatdagi muvaffaqiyatsizlik ham istisno bo'lmadi, albatta. Termamizning har bir o'yinidan so'ng, u xoh g'alaba bo'lsin, xoh mag'lubiyat, mutaxassis fikrini eshitging keladi. «InterFutbol» nashri aynan shu masalada O'zbekiston milliy jamoasi sobiq ustozi, 2006 yilda Osiyoning eng yaxshi murabbiyi sifatida tan olingan Rauf Inileev bilan suhbatda bo'ldi. AFSUS... - Rauf Talgatovich, Janubiy Koreya termasiga qarshi kechgan o'yin haqida suhbat boshlar ekanmiz, bu boradagi taassurotlaringizni aytib bera olasizmi? Uchrashuvdan so'ng sizda, eng avvalo, qanday hissiyot kechdi? - Afsuslanish! Faqat afsuslandim. To'g'risi, o'yinning qaysidir qismida futbolchilarimizning g'alaba qozonishlariga ishonib qolgan ekanman. Biroq keyinchalik voqealar rivoji o'zgarib ketdi va mag'lubiyat qayd etildi. Bu esa juda alam qildi. Chunki muvaffaqiyatga erishish mumkinligi ochiq-oydin ko'rinib qolgani holda o'yinni boy berdik. Shu uchrashuv bilan birga ko'p narsalar ham qo'limizdan ketdi. Qur'a tashlangach, raqiblar va taqvim biz uchun qay darajada qulay kelgani haqida qancha gapirgan edik? Endi o'sha imkoniyatlarning barchasi havoga uchdi. Aksincha, ikkinchi davrada endi bizga oson bo'lmaydi. Afsus, Janubiy Koreya termasiga qarshi kechgan bahsda vaziyatni o'nglash imkoni bor edi, ammo undan foydalana olmadik. - Aynan qaysi jihat noto'g'ri bajarildiki, O'zbekiston milliy jamoasi mag'lubiyatga uchradi? Qaerda xatoga yo'l qo'ydik? - Bu savolga birgina javob qaytarishim mumkin - mazkur bahsda Janubiy Koreya termasi g'alaba qozonmadi, balki biz mag'lubiyatga uchradik. Raqib shunchaki, o'z ishini bajardi, xolos. Biz esa o'sha ishni oxiriga etkaza olmadik. Janubiy Koreya jamoasi ikkinchi bo'limda o'yinini o'zgartirdi. Biroq g'alabani yulqib olar darajada kuchayib ketdi, deyolmayman. To'g'ri, zaxira almashtirishlari o'z o'rnida bo'ldi, maydonga tushgan futbolchilar ancha samarali harakat qildilar. Lekin ushbu uchrashuvda g'alaba qozonish imkoniyatimiz yuqori edi. Aksincha, bizda aynan zaxira almashtirishlari muammolar keltirib chiqardi. Raqibning gollari shundan so'ng urildi. HUJUM - Aleksandr Geynrix o'yinni kuchaytira olmadi, deb hisoblaysizmi? - Yo'q. Aksincha, Geynrix o'yinni kuchaytira oldi, ammo bu ta'kid faqat hujum chizig'iga tegishli. Bizga esa o'sha vaqtda bu mutlaqo kerak emas edi. Aleksandr asosan pozitsion o'yin vaqtida foyda keltiradigan hujumchi. Kichik hududda raqibning bir necha futbolchisini nostandart harakat evaziga aldash, pas berish va himoyani yorib o'tishda samarali o'ynaydi. Biroq Janubiy Koreya termasi bilan bo'lgan bahs ancha boshqacha ruhda kechdi. Bu uchrashuvda himoyani mustahkamlash va qarshi hujumlardan imkoniyat qidirish lozim edi. Ayniqsa, ikkinchi bo'limda shunga ko'proq ehtiyoj sezilayotgandi. Geynrix esa qarshi hujumlarga o'tish jarayonida ko'p ham foyda keltirmaydi. - Shu o'rinda Igor Sergeev xususida ham fikr bildirib o'tsak. U haqida nima deya olasiz, asosiy tarkibda o'ynagani to'g'ri bo'ldimi? - Sergeevda dastlabki tezlik u qadar yuqori emas. Bu esa qarshi hujumlarni rivojlantirishda pand berib qo'yadi. E'tibor bergan bo'lsangiz, birinchi bo'limning o'zida Igorda raqibdan qochib ketish uchun ikkita imkoniyat bo'ldi, ammo foydalana olmadi. Mana shunday vaziyatlardan birida darvozabon undan oldin to'pga etib keldi, ammo uni tepib yuborishda xatoga yo'l qo'ydi. Marat Bikmaev aynan shu holatdan foydalana oldi. - Oxirgi vaqtlarda Sergeevning mutlaqo omadi kelmayapti. Bunday vaqtda uni maydonga tushiraverish shartmikan? Ushbu holat hujumchining zarariga ishlamaydimi? Balki unga zaxirada o'tirib, vaziyatni his qilib olish imkonini berish kerakdir? Davomi interfutbol.uz saytida.
— deya xabar beradi uff.uz nashri.