Bir necha yil muqaddam Robert Levandovski yanada yuksakroq marralarni zabt etish maqsadida Dortmundni tark etgandi. «Borussiya» D. uning o'rnini boshqa bir «snayper» bilan to'ldirdi. Shu tariqa bundesligadagi o'ziga xos «El klassiko»da ajoyib «duel» yuzaga keldi. Ikki nemis grandi hujumchilarining so'nggi qarama-qarshiligida «Borussiya» D. vakili ishonarli g'alabaga erishdi. Marhamat, «Borussiya» D.-«Bavariya» bahsining Obameyang va Levandovskiga tegishli lavhalari bilan tanishing. Robert Levandovs­ki dortmundliklar jamoasining 3 nafar markaziy himoya­chilari qo'rshovida hech narsaga erisholmadi. Vaholanki, polshalik hujumchini qanotlarda Frank Riberi hamda Tomas Myuller qo'llab turishdi. Tomas Tuxel ularga qarshi Bartra, Sok­ratis va Ginterni jangga tashladi. Albatta, Per-Emerik Obameyang ham oldingi chiziqda yolg'iz emasdi - Adrian Ramos u bilan yonma-yon to'p surdi. Adrian bosh bilan yaxshi o'ynashi bois, yakkakurashlardagi to'qnashuvlarning asosiy qismi uning zimmasiga tushdi. Natijada uning gabonlik jamoadoshida erkin harakat qilish uchun bo'sh hududlar yuzaga keldi. 3-7-daqiqa. Obameyangning to'p bilan ilk muloqoti uni yo'qotish bilan yakunlandi. Bir necha daqiqadan so'ng esa Per-Emerik gol bilan yakunlangan kombinatsiyani tashkil etdi. Levandovski bo'lsa chap qanotdan uzatilgan to'pni egallash jarayonida o'yin qoidasini buzdi. 11-daqiqa. Gol! Obameyang! Dort­mundliklarning gabonlik hujumchisi dastlabki ballarni qo'lga kiritdi. Nafis harakatlari bilan to'pni Pishekka oshirib, o'zi qulay vaziyatga oshiqdi. Gyottsedan qabul qilingan to'pni Noyer darvozasiga joylab qo'ydi. Hujumchi bu muvaffaqiyatni maydonda «otjimanie» mashqini bajarish bilan nishonladi. Shu asnoda Afrika vakili Tuxel tomonidan belgilangan jazo chorasidan norozi emasligini ifodalagan bo'lsa, ajabmas. 13-18-daqiqa. Levandovski ijrosidagi samarasiz harakatlar. U avvaliga to'pni yo'qotib qo'ydi, ke­yin o'yindan tashqari holatda qolib ketgani sababli vaqtida tezlik olishga ulgurmay, to'pga kech qoldi. Agar to'pga egalik qilganida, darvozabon bilan birma-bir vaziyatga chiqardi. 19-daqiqa. «+». Mezbonlar ikkinchi golni amalga oshirishga yaqin turishgandi, Per-Emerik diqqat markazida: to'pni egallab oldi-da, «nuqta»ga etkazib berdi. Ammo uni darvozaga to'g'rilab qo'yadigan o'yinchi topilmadi. 20-daqiqa. «+». Gabonlik hujumchiga yana bir ball. qanot bo'ylab tezlikni oshirib, to'pni jarima maydonchasiga yo'lladi. Shyurrle esa to'pni to'ppa-to'g'ri Manuelning qo'liga topshirdi. 27-daqiqa. «+». To'pni egallash maqsadida Robert markaziy chiziqqacha chekinishga majbur bo'ldi. Lekin bu urinishlar samara bermadi. Dastlabki muvaffaqiyatli harakatni polshalik hujumchi ikkinchi bo'limning yarmida amalga oshirdi: o'ng qanotdan shiddatli reyd uyushtirib, Bartrani qoida buziga majbur etdi. Ispaniyalik himoyachi sariq kartochka bilan «siylandi». 43-daqiqa. Levandovskining qanotdan amalga oshirgan noaniq uzatmasi rikoshetlar evaziga xavfli vaziyatni yuzaga keltirdi. Bu harakatlar baholanmaydi. 45-daqiqa. «+». Polshalik hujumchi birinchi bo'limda 3 marta burchak to'pi ishladi. Buni 1 ball bilan taqdirlasa arziydi. Tanaffusga Obameyang Levandovskini ortda qoldirgan holda yo'l oldi. Mezbonlar hujumchisi hisobida gol bor, foydali harakatlar bo'yicha hisob-3:2. Obameyang uzatmalarining aniqligi 75 foiz, Levandovskiniki esa 36. Robert 5 marta to'pni oldirib qo'ydi, Per-Emerik esa 2 marta. Davomi interfutbol.uz saytida.
— deya xabar beradi uff.uz nashri.