XX asr boshlarida futbolni bizning davrimizdagiga qaraganda yaxshiroq o'ynashgan, degan fikrga qanday qaraysiz? Bu insonlar professionallar emas, shunchaki havaskorlar bo'lishgan, desak-chi? Ishonmayapsiz-a? Unda quyidagi maqolani o'qing va xulosa chiqaring. Haqiqatan ham, o'tgan asr boshlarida ikki buyuk havaskor futbolchilar yashab o'tishgan. Ularning biri vrach-bakteriolog kasbini asosiy deb bilgan bo'lsa, ikkinchisi arxitektorlik qilib, oila tebratardi. Biz yuqorida bu o'yinchilarni havaskor deb atarkanmiz, ular futbolga ikkinchi darajali masala sifatida qarashgan, demoqchi emasmiz. Shunchaki, bu insonlar boshqa kasbning boshini tutgan holda, futbol orqali dunyoga tanilishgandi. Darvozabonlar shahzodasi Dik Ruz - vrach-bakteriolog haqida hikoya U chindan ham futbol tarixidagi eng buyuk va o'ta iste'dodli darvozabon edi. Dik Ruzni hatto darvozabonlar qiroli, deb atashgan. U iqtidori jihatidan Devid Bekxemdan aslo qolishmas, shu bilan birga, Roman Shirokov singari «tili zahar», Erik Kantona kabi ayrim vaziyatlarda o'zini tuta olmasdi - bu insondagi iqtidor shundayin salbiy jihatlar bilan uyg'unlashib ketgandi. Dik Ruzning asosiy fazilatlari sifatida esa qu-yidagilarni keltirish mumkin: - tanaffus paytida darvoza to'sini ustuniga tribunalarga qarab o'tirib olardi-da, semichka chaqqancha Britaniya imperiyasining dolzarb muammolari haqida tomoshabinlar bilan suhbat qurardi. Shu bois, darvoza or-qasidagi tribunalarga biletlar doim qo'lma-qo'l bo'lib ketardi. Tasavvur qiling, hozir biror bir posbon shundayin o'tirgancha muxlislar bilan muloqotga kirishsa qanday bo'larkin? - 11 metrlik nuqtadan berilgan zarbalarni qaytarishda Ruz eng avvalo, raqib  futbolchisiga ruhiy ta'sir o'tkazishga intilardi - jumladan, oyoqlari bilan ital-yanlarning «spagetti-oyoqlar» raqsini ijro etardi; - o'z jarima maydonida kutilmagan tezkor reydlarni amalga oshirardi: Ruz darvozadan ancha uzoqqa chiqib ketib, raqib futbolchisining uzatmasini qaytargancha (o'sha paytdagi futbol qoidalarida darvozabonga to'pni qaytarib urib yuborish (aslo ushlab olish emas) ruxsat etilgandi) to'p bilan maydon markaziga yugurib borar va uni bir zarb bilan raqib jarima maydonchasidagi jamoadoshiga etkazib berardi; aynan bu darvozabonning bunday harakatlaridan bezigan raqiblarning shikoyatidan charchagan mamlakat futbol assotsiatsiyasi darvozabonlar uchun qoidaga o'zgartish kiritishga majbur bo'ldi - futbol tarixida birinchi va oxirgi marta konkret futbolchi sababchi bo'ldi, bunga!.. - o'yin paytida o'zini antiqa tutishi: Ruz o'sha davr qoidalari taqiqlamagani bois, yugurganicha maydonning xohlagan burchagiga chiqib borardi-da, raqibini elkasi bilan to'xtatib qolishga intilardi; bir safar, raqib jamoa futbolchisi qanot bo'ylab jarima maydoniga yorib kirarkan, o'zi tomon paravozday uchib kelayotgan darvozabonlar shahzodasini sezmay qoldi va shoshilinch tez yordamda kasalxonaga olib ketildi; - maydon tashqarisidagi g'alati hazillar: masalan, Uelsga qarshi mehmonda bo'ladigan bahs oldidan valliyalik Ruz jurnalistlar oldiga qo'li bog'langan holda chiqdi va uchrashuvni barmoqlari singan holda o'tkazishiga to'g'ri kelishini ma'lum qildi; bundan xabar topgan irlandiyaliklar g'alabani nishonlashga kirishib ketishdi. Ruzning niyati ham shu edi: aslida esa uning barmoqlariga jin ham urmagandi. - futbol - kundalik chiqimlar uchun: uchrashuvlardagi ishtirok uchun maosh olmagan Dik Ruz (darvozabonlar shahzodasi karerasi yakunlanguniga qadar ham havaskorligicha qolgan) mablag' masalasida klublar bilan kelishuvga ega edi - kundalik chiqimlar qonun bo'yicha taqiqlanmagani bois, ikki tomon bu borada kelishib olishgandi. Bundan imkon qadar foydalanishga intilgan Ruz klub hisobidan qimmatli kostyum va poyabzallar sotib olar, transportga misli ko'rilmagan xarajatlarni qilardi, klub hisobxonasiga restoran va   urfga kirgan klublardan hisob-kitob varaqasini yuborishni ham unutmasdi... Davomi "InterFUTBOL" gazetasida.
— deya xabar beradi uff.uz nashri.