U to'p bilan ishlashda Messi kabi ustomonmas, Zlatan Ibragimovich kabi shiddatkor forvardmas, Neymar kabi driblingchimas. Ammo hozirga kelib deyarli barcha sovrinlarni qo'lga kiritib ulgurdi – EChL va jahon chempionatida porladi. Ehtimol «Bavariya» yarim himoyachisining harakatlari g'ayritabiiy tuyular, ammo yakunda samara keltirayotgani inkor etib bo'lmas haqiqat. Tomas Myuller xorijlik hamkasblarimiz bilan suhbat chog'ida turli mavzudagi savollarga javob qaytardi.   - Tomas Myuller - benazir o'yinchi... - Siz shunday deb o'ylayapsiz. Men esa, shunchaki, o'zimga sodiq qolishga intilyapman. - Ham shaxs, ham futbolchi sifatida o'sishga erishdingiz. 2009 yilda uylangansiz, tulporlaringiz bor, golfga qiziqasiz... 27 yoshli o'yinchi uchun noddatiy holat. - Xobbiga kelsak, ular haqiqatan noodatiy, chunki futbol - mening ishim. Odatda, 27 yoshli kishi millionlar o'yiniga qiziqadi. Mening holatimda esa boshqa biror narsa izlashga majbur bo'ldim. Germaniyada urfga kirgan boshqa sport turlari jismoniy jihatdan to'g'ri kelmadi, shu bois ulardan voz kechdim. Basketbol va tennis o'ynashni yoqtiraman. Lekin bir haftada uchta o'yin o'tkazishimni inobatga olsak, basketbol maydonchasida yugurishga xohish qolmaydi. Qandaydir sokinroq sport turini tanlash lozim. - Xotirjamsiz, ko'chalarda muxlislarga ko'rinmay yurishni uddalaysiz. Ammo so'nggi paytlarda bunga imkon qolmayapti, to'g'rimi? - Darhaqiqat, kundalik hayotda odamlarga ko'rinmay yurish qiyin, ayniqsa, Myunxen kabi katta shaharda. Ammo nolimayman: professional futbolchi bo'lganim tufayli omma orasida taniqliman. Muxlislarni meni taniganlikda ayblay olmayman-ku. - Tez-tez mamlakatdan chiqishingizga to'g'ri keladi... - O'z hayotim bilan yashayapman. Mashhurlik hech qachon xalal bermagan. Omma oldiga fanatlar uchun chiqishga intilaman. Oila a'zolarim yoki do'stlarim bilan sayohat uyushtirganimda esa, shaxsiy doiram imkon qadar daxlsiz bo'lishini xohlayman. Ba'zan suratga tushishni xohlaganlarga rad javobini bersam, ranjiydiganlar ham uchraydi. Kimdir holatimni tushunadi, kimdir esa yo'q. Hammaning ko'nglini birdek olish imkonsiz. - Golf va futbolni o'zaro uy-g'unlashtirish mumkinmi? Misol uchun, yaxshi zarba berish uchun texnika kerakmi? - Buni ichki hissiyot belgilaydi. - Demak, gap ruhiyatga borib taqaladi? - Ha, hayotimizda ko'p narsa psixologiyaga bog'liq. Ryder Cup musobaqasini kuzatib boraman, u erda bosimga chidamli bo'lish lozim, axir golfning ham ishqibozlari bisyor, sizdan ko'p narsa kutishadi. Bu golfchilar uchun noodatiy turnir. Ular individiual tarzda qatnashishga ko'nikishgan, Ryder Cupda esa jamoa bo'lib o'ynash lozim. Yaxlit guruhning a'zosi ekanliklarini his qilish - ular uchun ajoyib tajriba. Xayriyat, biz futbolchilar har kuni shunday narsaga egamiz. - Hozir futbolda ko'plab ruhshunoslar, psixoterapevtlar bor. Ularning xizmatlaridan foydalanasizmi? - Bunga hojat yo'q, to'g'ri ruhiy tayyorgarliksiz professional sportda hech nimaga erishib bo'lmasligini bilaman. Mabodo shunday muammoga yo'liqsam, kichik yordamga ehtiyoj sezilsa, mutaxassislarga, albatta, murojaat etaman. Ular qiyin vaziyatda asqotadigan bir-ikkita zarur maslahatlarni berishga qodirlar. - Karlo Anchelotti o'z vaqtida, Krishtianu Ronaldu va Zlatan Ibragimovich singari superyulduzlar bilan birga ishlagan. Ular italiyalik mutaxassisning murakkab vaziyatlarga o'ta xotirjam munosabatda bo'lishini yoqtirishadi. Sizning bu boradagi fikringiz qanday? - Karlo vaziyat taqozo etsa, mabodo shogirdi boshqacha muomalani tushunmasa, shovqin solishi ham mumkin. Umuman, yaxshi o'yin ko'rsatolmasak, ovozini balandlatmaydi - faktlarga tayangan holda bizdagi ishonchni oshirib, mavjud qo'rquvni yo'qotishga urinadi. Menga bu narsa juda ma'qul keladi. - Anchelotti sizlar bilan nafaqat futbol, balki boshqa mavzular bo'yicha ham suhbatlashadi. Bu holat yordam beryaptimi? - Birinchi navbatda, bor e'tiborni futbolga qaratamiz. Lekin suhbat mavzusini o'zgartirish ham ziyon qilmaydi, shu tariqa shaxsiy munosabatlar yaxshilanadi, qolaversa, natijalarga ta'sir ko'rsatishi mumkin. Lekin baribir, avvalo, maydonda nima bo'layotgani muhim. - Odatda, qiyin vaziyatlarda futbolchilar jamoani ruhlantirishga urinishadi. «Bavariya» kiyinish xonasida shunday mas'uliyatni zimmasiga oladiganlar bormi? - Ko'pincha o'zaro suhbatlashamiz. Masalan, Filipp Lam va Manuel Noyer juda tajribali futbolchilar. Ular qatoriga o'zimni ham qo'shishim mumkin. Tez-tez fikr almashamiz. Ba'zan oddiy narsalarni e'tibordan chetda qoldirish holati kuzatiladi va bunda o'zgalar maslahati asqotadi. Davomi Interfutbol.uz saytida.
— deya xabar beradi uff.uz nashri.