O'zbekiston o'smirlar terma jamoasi a'zosi Abdulhay Ismoilov Osiyo futbol konfederatsiyasi (OFK) Antidoping qoidalari 6-bandini buzganligi uchun 1 yilga diskvalifikatsiya qilindi. Shu yilning 15 sentbyar – 2 oktyabr kunlari Hindistonning Goa shahrida bo'lib o'tgan U-16 Osiyo chempionati vaqtida olingan doping-probalarda Abdulhay Ismoilovning namunasida taqiqlangan moddalar aniqlandi. Shu munosabat bilan Abdulhay Ismoilov futbolga oid har qanday faoliyatdan 1 yilga chetlatildi. Uning diskvalifikatsiyasi OFK Antidoping qoidalari buzilgan sanadan boshlab, ya'ni, 2016 yilning 3 noyabridan kuchga kirit, 2017 yilning 2 noyabriga qadar davom etadi. Abdulhay Ismoilov mazkur holat takrorlangan taqdirda qattiq jazolanishi haqida ogohlantirildi. Ma'lumot uchun, Abdulhay Ismoilov Hindistonda bo'lib o'tgan U-16 Osiyo chempionatida KXDRga qarshi (3:1) “D” guruhi 3-turida hamda Iroqqa qarshi (0:2) chorak finalida maydonga tushgandi.
— deya xabar beradi uff.uz nashri.