Bugun  «SE» gazetasi ma'lumotlari asosida «Jenoa» hujumchisi Jovanni Simeone haqida hikoya qilamiz. Zero, buning uchun asos bor - mashhur Diego Simeonening o'g'li Italiya «A» seriyasi 14-turi doirasida «Yuventus»ga, yanada aniqrog'i, kimsan Janluiji Buffonga bir juft gol «tortiq» etib, «Jenoa»ning «sensatsion» g'alabasiga asos soldi - 3:1. E'tiborlisi, u turinliklar darvozasini qandaydir 13 daqiqa ichida 2 bora ish-g'ol qilib, haqiqiy ota-o'g'il ekanligini isbotladi. OILAVIY AN'ANA - Otam vaqtida «Yuventus» darvozasiga gol urganini so'zlab bergandi. Shunday ekan, men ham turinliklarni «nasiba»siz qoldirmasligim kerak edi,-dedi Jovanni Simeone «keksa sinora»ga qarshi kechgan o'sha o'yin yakunlangach. Ha, Diego Simeone ham «Yuventus» darvozasini ishg'ol qilgan - 2000 yili «Latsio» safida to'p surganida. O'shanda rimliklar xuddi «Jenoa» kabi g'alabani tantana qilishgandi, to'g'ri, nisbatan kamtarin hisobda - 1:0. Lekin katta Simeone urgan gol ortidan kelgan 3 ochko «burgutlar» uchun ulkan ahamiyat kasb etgan. Chunonchi, ular chempionat finishida aynan turinliklarni bir ochko ortda qoldirib, skudetto sohibiga aylanishgan. Shu ma'noda aytsak, genuyaliklarning zafari shunchaki, g'urur xarakteriga ega. Har-qalay, ular ayni payt katta vazifalarni hal qilishmayapti. Aytgancha, kichik Simeonening muvaffaqiyatidan so'ng qiziquvchan jurnalistlar darhol hisob-kitobni boshlashdi: ota va o'g'il «keksa sinora»ni naq 6084 kunlik farq bilan mag'lublik ko'chasiga etaklashibdi. Umuman, kichik Simeone uchun Buffon darvozasiga yo'llangan 2ta gol hozircha faoliyati davomida ro'y bergan eng esda qolarli voqeadir. U bungacha, ya'ni otasi kabi Apennin yarim oroliga kelgunicha Argentinada «Banfild» va «Rivert Pleyt» jamoalari uchun o'ynadi, ammo jahon ommasi e'tiborini o'ziga qaratolmadi. Vaholanki, Jovannini anchadan buyon istiqbolli iqtidor sifatida maqtashmoqda. Umuman, uning yozda Rio Olimpiadasida ishtirok etgani bejiz emas. OTA MASLAHATI Katta Simeone vaqtida Italiya futbolida yayrab-yashnab to'p surgan. U 8 yil oralig'ida «Piza», «Inter» va «Latsio» jamoalari sharafini munosib himoya qilgandi. Bir qarashda, Jovanni Apenninga aynan otasining maslahati bilan yo'l olganini ta'kidlash mumkin. Biroq bunday emas. «Otam nima degandi? Italyanlarga tezroq javob berish talab etilgan payt u bilan gaplashish imkoniyatim yo'q edi. Chunki otam Avstraliyaga ketgandi. Shuning uchun yakuniy qarorni mustaqil qabul qilganman. Otam bilan esa bu mavzuda keyinroq gaplashdik. U mening «Jenoa»ga o'tayotganimni eshitib, rosa xursand bo'ldi. Xususan, Italiyada taktikaga katta e'tibor berilishi va bunga tayyor turishim lozimligini uqtirdi», - deya hikoya qilgandi Jovanni «A» seriyasida o'ynash qarori haqida. Demakki, uning aynan «Jenoa»ni tanlashiga otasi emas, balki klub xodimlari - prezident, murabbiy va futbolchilar ta'sir o'tkazishgan: «Ha, meni go'yoki, barchalari bir yoqadan bosh chiqargandek, chorlashdi! Deylik, futbolchilardan Nikolas Burdisso faollik ko'rsatdi. O'zaro suhbatlashuv yakunidayoq to'liq ishonch hissini sezgandim». To'g'ri, katta Simeonening o'g'liga bir-ikki zarur maslahatlarni bergani tabiiy hol. Ulardan eng asosiysi ampluasini o'zgartirib, hujumga o'tishi xususida edi. Axir Jovanni boshida xuddi otasi kabi markaziy yarim himoyachi pozitsiyasida o'ynagandi. «Otam bir safar qat'iy ohangda ta-yinladi: «Sening joying - jarima maydonining ichi». U meni aynan shu nuqtada o'zimni ko'rsata olishimga ishontiribgina qo'ymay, hattoki, raqib jarima maydonidan chetga chiqishimni taqiqlab ham qo'ydi» - bu ham kichik Simeonening hikoyasidan iqtibos. Aslida ushbu maslahatni olmaslik ham mumkin emasdi. Zero, u nafaqat qadrdon otasi, balki futbolda nimanidir teran tushunadigan katta  professionalga tegishli edi. KUMIRI - IKARDI Xullas, kichik Simeone ayni payt markaziy hujumchi pozitsiyasida to'p surmoqda va yaxshigina tezligiyu, himoyachilarga qarshi kurashish salohiyati bilan alohida ajralib turibdi. Uning o'zi Italiyaga ko'chib o'tgani hamono bu borada shunday degandi: «Bo'sh hudud topish va bundan samarali foydalanishni xush ko'ruvchi sof markaziy hujumchiman. Boshqacha aytganda, raqib jamoa darvozasiga teskari turib harakatlanadigan forvardlarga o'xshashni sira xohlamayman». Jovanni o'z gaplariga isbot tariqasida «A» seriyasidagi dastlabki 4ta golini ham raqiblar darvozasiga tik qaragan holda urdi. Qisqasi, kichik Simeone to'pni qabul qilgach, zarba yo'llashgacha unga imkon qadar kam teginadi. Shuning barobarida to'pni ham o'ng, ham chap oyog'ida birdek tepish salohiyatiga ega. Italiyada bunday uslubda to'p suradigan eng yorqin futbolchi - bu «Inter» hujumchisi Mauro Ikardi. Jovannining o'zi aynan «qora-ko'klar» sardori harakatlaridan ilhomlanishini tan olib ulgurdi: «Ha, Mauroning o'yin uslubi diqqatimni alohida tortadi. U bilan Argentina yoshlar terma jamoasida o'ynagan payt tanishgandim». Jovanni bundan tashqari, Radamel Falkao va Ronaldoning o'yin uslubini qadrlaydi. Qulay vaziyatlarga ehtiyotkorona yondashish - kichik Simeoneni boshqalardan ajratib turuvchi yana bir jihat shu. Argentinalik yosh hujumchi statistika bo'yicha bitta o'yinda o'rtacha hisobda atigi 1,4 marta zarba amalga oshirmoqda (dastlabki 11ta o'yinda jami 15ta zarba). Bu zarbalar soni bobida «A» seriyasi bo'yicha atigi 87-ko'rsatkichdir! Qarang, Jovanni ijrosidagi shu sanoqli zarbalardan 4tasi gol bilan yakunlandi. Bunisi endi turnirdagi 21-ko'rsatkich hisoblanadi. Xullas, Italiya chempionatida debyut mavsumini o'tkazayotgan o'smir yigit uchun juda yaxshi FIK (foydali ish koeffitsienti). Ha, ko'rinishidan, pragmatik yondashuv unga otasidan meros o'tgan, shekilli. Davomi interfutbol.uz saytida.
— deya xabar beradi uff.uz nashri.