"Qizilqum” — “Buxoro” uchrashuvdan so'ng o'tkazilgan matbuot anjumanining ikkinchi qismida mezbonlar bosh menejeri Hamidjon AKTAMOV qatnashdi.
— Bugun o'yin qiyin o'tishini oldindan bilardik, — deya so'z boshladi Hamidjon G'ulomovich. — “Buxoro” kuchlilar safida o'z o'rnini saqlab qolish uchun kurashayotgan jamoa. Ular uchun har bir o'yin finalga teng,  desam yanglishmayman. Jamoamiz esa Qo'qonda o'tgan oxirgi bahsda qimmatli ochkolarni qo'ldan chiqargan va bugun muxlislarni o'z g'alabamiz bilan quvontirishimiz shart edi.  Shu bois, uchrashuvga puxta tayyorgarlik ko'rdik.
“Buxoro” jamoasiga qarshi o'yin oldidan himoya chizig'imizda muammolar bor edi. Tajribali himoyachilar Asqarjon Muhiddinov jarohati, gruziyalik legioner Georgiy Kvesieshvili esa sariq kartochkalari soni to'rttaga etganligi tufayli bugun maydonga tusha olishmadi. Shunga qaramay, jamoamiz a'zolari faqat g'alaba ilinjida maydonga chiqdi va ularning yo'qligini bilintirishmadi. Futbolchilarimiz ko'rsatmalarimizni to'g'ri amalga oshira oldilar. Muxlislarimizni g'alaba bilan tabriklayman.
Bugun yirikroq hisobda g'alaba qozonishimiz ham mumkin edi. Vahobov, Alimov, Derkachda golga tortadigan bir necha qulay vaziyatlar yuzaga keldi. Ammo buxoroliklar posboni chinakam mahorat ko'rsatganligiga barchangiz guvoh bo'ldingiz.
Chempionat oxirlagani sayin uchrashuvlar yanada shiddatli tus olmoqda. Mavsumni jamoamiz oldingi yillardagiga qaraganda, yuqori o'rinlarda tugatishni o'z oldiga maqsad qilib qo'ygan. Ishonamanki, albatta buning uddasidan chiqamiz.
— deya xabar beradi uff.uz nashri.