Joriy yilda Avstraliya terma jamoasi faxriy hujumchisi Tim Keyxill terma jamoa uchun 49-golini urgani, terma jamoamizning o'ziga xos forvardi Aleksandr Geynrix esa terma jamoamiz tarixidagi eng yaxshi to'purar bo'lish uchun kurashni qizitayotgani bizni Osiyodagi terma jamoalarning to'purarlari va ularning faoliyatidagi o'ziga xos qirralarga to'xtalib o'tishga yana bir karra undadi. Aytgancha, bir narsa yodimizdan chiqibdi: jahon futbolidagi rekord natija, ya'ni o'z terma jamoasi uchun rekord miqdorda gol urish ham bizning qit'aga tegishli: Ali Dai Eron terma jamoasi uchun jami 109 ta gol urgan! Eron Islom Respublikasi. Ali Dai (149ta o'yin, 109 ta gol). 1969 yil 21 martda tavallud topgan. Tehronning «Istiqlol» futbol klubida tarbiya topgan ushbu futbolchi faoliyatini 2007 yilda «Saypa» safida yakunladi. IFFHS versiyasiga ko'ra Osiyoning XX asrdagi eng yaxshi futbolchilari orasida 7-o'rinni egallagan. 1996 yilda Eron terma jamoasi uchun rasmiy o'yinlarda 20ta gol urib, rekord o'rnatgan. Eng qizig'i, u Eron milliy chepionatida atigi bir marta (2004 yil) to'purar bo'la olgan, xolos. 2016 yil 5 iyuldan boshlab «Naft» (Tehron) klubi bosh murabbiyi. YuNISEF «Yaxshi niyat elchisi». Biznes sohasida ham yaxshigina muvafaqqiyatlarga erishyapti. Yaponiya. Kunishige Kamamoto (84ta o'yin, 80 gol). 1944 yil 15 aprelda tavallud topgan bu futbolchi o'z faoliyatida faqat «Yanmar Dizel» (1967-1984) klubi uchun o'ynagan. O'zi umuman yaponlarda bir kompaniyada umr bo'yi sadoqat bilan ishlash an'anasi mavjud. 1966 yili Vaseda universitetida bakalavr darajasini olgan ushbu futbolchi terma jamoaga kollej jamoasidan jalb etilganini ko'pchilik bilmasa kerak. 1995 yildan boshlab siyosat bilan shug'ullana boshladi. 1998 yil iyuldan boshlab Yaponiya Futbol Assotsiatsiyasi vitse-prezidenti. Iroq. Husayn Said (137ta o'yin, 78 gol). 1958 yil 21 yanvarda Bag'dod shahrida tug'ilgan. Ahmad Radhi va Husayn Said Iroqning o'tgan asrdagi eng yaxshi futbolchilari deb topilgan. Dunyo terma jamoalari to'purarlari reytingida 5-o'rinni band etgan. IFFHS versiyasiga ko'ra Osiyoning XX asrdagi eng yaxshi futbolchilari orasida 25-o'rinni egallagan. 1980, 1984, 1988 yilgi Olimpiya o'yinlari, 1986 yilgi jahon chempionati ishtirokchisi. Professiosanl faoliyatini yakunlagach, asosan futbol mansabdori sifatida tanilgan. 2004-2011 yillarda Iroq FA prezidenti (hisob bo'yicha o'n oltinchi). Kuvayt. Bashar Abdulloh Salim Abdulaziz (133ta o'yin, 75 gol). 1977 yil 12 oktyabrda tug'ilgan. 1996-1998 yillardagi Quvayt futboli «oltin davri» asoschilaridan biri. 2005 yil 25 mart va 17 avgustda O'zbekiston terma jamoasi darvozasiga gol urgan. Klubdagi faoliyatining 7 yili ijarada o'tgan. 2016 yil 13 yanvarda xayrlashuv uchrashuvini o'tkazgan. Saudiya Arabistoni. Majid Abdulloh (116ta o'yin, 71 gol). 1959 yil 11 yanvarda tavallud topgan. Otasi Ahmad Abdulloh turli futbol klublarida menejer sifatida ishlagan. Faoliyati davomida faqat «Al Nasr» klubi safida to'p surgan. 1984, 1985, 1986 yillarda Osiyoda «Yil o'yinchisi», «Arab olmosi» nomi bilan ta'riflangan. 2008 yil 20 mayda «Al-Nasr» va «Real Madrid» o'rtasida ushbu futbolchining xayrlashuv uchrashuvi o'tkazilgan. Davomi Interfutbol.uz saytida.
— deya xabar beradi uff.uz nashri.