«Seltik», «Aston Villa» klublari va Bolgariya termasining sobiq futbolchisi Stiliyan Petrov shotlandiyalik taniqli jurnalist Grem Xanterga intervyu berdi. Quyida ana shu suhbatni o'qishingiz mumkin.     — So'nggi paytlarda golf bilan shug'ullanyapsizmi? — Ha, taxminan ikki yil oldin boshlagandim. Lekin hozirda o'yinim ancha yaxshilangan. Har doim dars­larga qatnashyapman. Futbol o'ynab yurgan kezlarim atrofimdagilar golfni yoqtirishardi, men esa umuman qiziqmasdim. O'rtoqlarim golf maydoniga ketishganda, uch-to'rt soat dam olishni ma'qul ko'rardim. Lekin faoliyatimni yakunlaganimdan so'ng ushbu sport turini yoqtirib qoldim. — Golfning «xumor»i tutadimi? — Ha-ha. Birinchi ideal zarbadan keyin uni yana takrorlagingiz keladi. Lekin bunday holat nafaqat sport, balki hayotda ham kuzatiladi. — Uchrashuvlarga qanday tayyorlanasiz? — Umuman asabiylashmayman. Bolaligimda futbolchi bo'lgan otam va bobom hamma narsaga xotirjam qarash kerakligini uqtirishgan, bundan to'g'ri saboq olganman. Hozirda golf o'ynayotganda ham, oxirgi zarbani yo'llayotganda ham xotirjam bo'lishga urinaman. Albatta, adashishim mumkin, lekin bundan cho'chimaslik kerak. Axir xamma xato qiladi. Agar mag'lubiyatdan qo'rqmasangiz, g'alaba qozonish imkoniyati ortadi. Bir paytlari xato qilsam yig'lardim. Shunda bobom «Barcha buyuk insonlar - yozuvchilar, sportchilarga qara. Ularning barchalari omadsizlikka uchrashgan, biroq taqdirga tan bermay, urinishni takrorlashgan. Nima uchun? Chunki ular o'z ehtiroslarini, asablarini jilovlay olishgan», derdi. Qancha ko'p asabiylashsangiz, xatolar shuncha ko'payaveradi. Birining ortidan ikkinchisi, uchinchisi kelaveradi. Shunchaki, vaqt o'tgani sari xatolarning yomon joyi yo'qligini his qildim. Ular sizni kuchli qiladi. — Aleks Fergyuson ham raqibga to'g'ri baho berish, hattoki, noto'g'ri bo'lsada jiddiy qarorlar qabul qilishdan cho'chimaslikni aytardi. — Ayrimlar o'z omadsizligi bilan o'zini oqlashga urinadi. Agar muvaffaqiyat qozonsangiz, sizga bo'lgan talab oshib boraveradi. — Otangiz va bobongiz muhim saboq berishgan ekan... — Aynan shunday. Bolaligimda otam meni mashg'ulotga olib ketmas, «Piyoda yurishing va o'zingda bor narsani qadrlashni o'rganishing kerak. Aks holda, hech narsaga erisholmaysan», derdi. Butun faoliyatim davomida hech qachon mashg'ulotga kech qolmaganman. O'zini hurmat qilgan inson boshqalarning hurmatini ham joyiga qo'yadi. — Iqtidoringiz darajasini qachon anglab etgansiz? — Imkoniyatlarim borligini bilardim, ammo ularni amalga oshirish uchun ko'p ishlashim kerak edi. Kamquvvat bo'lganim bois oyoqlarimga kuch to'plash maqsadida mashg'ulotlardan so'ng ko'proq yugurardim, o'z ustimda ishlashdan to'xtamasdim. Har bir klubda yangi chaqiruvga duch kelganman. Masalan, «Seltik»ka ortiqcha vazn bilan borganman. Shu bois ham parhez qilish barobarida fitnes-murabbiy xizmatidan foydalanardim. Iqtidorning borligi yaxshi, lekin unga sayqal berishni ham unutmaslik kerak. Davomi Interfutbol.uz saytida
— deya xabar beradi uff.uz nashri.