O'zbekistonning birinchi raqamli tennischisi Sabina Sharipova 2016 yilgi tennis mavsumidagi muvaffaqiyatlarini yangi yilda ham davom ettirishni maqsad qilgan. SPORTS.uz axborot portali o'zbekistonlik muxlislarni ushbu ajoyib sportchimiz bilan yaqindan tanishtirish uchun Sabina Sharipova ishtirokida maxsus interyu uyushtirdi. O'z navbatida Sabina vaqtdan unumli foydalanishni ko'zlab saytimiz muxbirlarini o'zi mashg'ulot o'tkazayotgan kortga taklif qildi.
Sabina Sharipova – 1994 yilning 4 sentyabr kuni Toshkent shahrida tug'ilgan. Sakkiz yoshidan tennis o'ynaydi. Tennisdagi faoliyati davomida Xalqaro tennis federatsiyasi tasnifidagi to'qqizta musobaqaning yakkalik bahslarida, uchta turnirning juftlik bellashuvlarida bosh sovrinni qo'lga kiritgan.
Sabinaning otasi Alfred Sharipov futbolchi sifatida Buxoro, Samarqand, Toshkent shahri va xorijning professional futbol klublarida to'p surgan. Onasi Dinara Sharipova engil atletika bilan shug'ullangan.
Ota-onangiz sportchi bo'lganini bilamiz va bizga nega Siz aynan tennisni tanlaganingiz qiziq?
Darhaqiqat, oilamizda sportga katta e'tibor qaratiladi. Shuning uchun ota-onam o'zimni sinab ko'rish va bo'sh vaqtimni maroqli o'tkazishim uchun bolaligimdan tennisga berishgan. Nima uchun aynan tennisga olib kelishgani men uchun qorong'u. Bilganim shuki, tennis o'ynash menga yoqib qoldi va o'zimni bundan boshqa sport turida tasavvur qilolmayman. Men faqat tennisni deyman.
Ayniqsa, o'smirlar o'rtasidagi musobaqalarda ishtirok etganim tennisga bo'lgan qiziqishimni oshirdi. Ko'plab xalqaro musobaqalar, jumladan “Katta dubulg'a” turkumiga kiruvchi dunyodagi eng nufuzli to'rt turnir – Avstraliya ochiq chempionati, Rolan Garros, Uimbldon va AQSh ochiq chempionatlarining o'smirlar o'rtasidagi bellashuvlarida yaxshi o'yin ko'rsata olganman. Qizlar reytingida dunyoda 12-pog'onagacha ko'tarilganim o'zimga bo'lgan ishonchni oshirgan va katta tennisda nimalargadir erishishim mumkinligiga ishona boshlaganman.
Keyingi yillarda Siz asosan Xalqaro tennis federatsiyasi (ITF) tasnifidagi musobaqalarda ko'p ishtirok etyapsiz. Nega Ayollar tennis uyushmasi (WTA) turnirlarida kam ko'rinasiz?
ITF musobaqalarida ko'proq qatnashishimning asl sababi bu turnirlarda men asosiy to'rda o'ynayman. Mening reytingim ITF tasnifining mukofot jamg'armasi 50000, 75000 va 100000 AQSh dollari bo'lgan eng nufuzli turnirlarida asosiy to'rda o'ynash imkonini beradi. Qolaversa, bu turnirlarda bosqichdan bosqichga o'tishda ko'proq reyting ballari ishlab olish mumkin. WTA turnirlarini esa saralash bosqichidan boshlashimga to'g'ri keladi. Murakkab saralash o'yinlarida ko'p ball jamg'arib bo'lmaydi.
Sportda, ayniqsa, tennisda ko'pincha birdaniga muvaffaqiyatga erishish imkonsiz. Tennischi bosqichma-bosqich rivojlanib, o'yinini kuchaytirib boradi. Muhimi, o'z oldiga to'g'ri maqsad qo'yish va unga tinimsiz intilish. Sportchi maqsadiga etishi uchun har jihatdan tayyor bo'lishi kerak. Mening ham o'z yo'lim bor. Men tanlagan taktika avval ITF musobaqalarida reyting ballarini jamg'arib, keyin WTA turnirlarining asosiy to'ridan joy olishga harakat qilishdan iborat.
    Shu o'rinda, Sabina Sharipova tanlagan taktika o'zini oqlaganini aytib o'tish lozim. Iste'dodli tennischimiz 2017 yilning dastlabki kunlarida e'lon qilingan reyting jadvaliga ko'ra, faoliyatidagi eng yuqori o'rin – 148-pog'onadan joy oldi. Bu Sabinaning 2016 yilni muvaffaqiyatli o'tkazgani bilan bog'liq. Zero, iste'dodli tennischimiz 2015 yilning oxirida jahon reytingida 237-o'rinda qayd etilgandi.
Sabina, biz o'tgan yilgi mavsum siz uchun omadli bo'ldi, deb hisoblayapmiz. O'zingiz-chi?
To'g'ri, yakunlangan mavsumni barqaror o'tkazishga muvaffaq bo'ldim. O'zbekiston, Hindiston va Xitoydagi xalqaro turnirlarning yakkalik bahslarida bosh sovrinlarni qo'lga kiritdim. Qator musobaqalarda yarim final va finallarda o'ynadim. WTA turnirlarida ham avvalgi yillarga qaraganda yaxshiroq natija qayd eta oldim. Uchrashuvlarda qimmatli reyting ochkolarini qo'lga kiritdim va jahon reytingida sezilarli darajada yuqoriga ko'tarildim. Bu ochkolar meni WTA tasnifidagi musobaqalarning asosiy to'riga yaqinlashtiradi. Bu men uchun yangi bosqich bo'ladi.
2017 yilda esa ko'proq WTA turnirlarida ishtirok etishni rejalashtiryapman. Mavsum men uchun “Katta dubulg'a” turkumiga kiruvchi birinchi turnir – Avstraliya ochiq chempionatidan boshlanadi. Yil davomida “Katta dubulg'a”ning qolgan uch turniri - Rolan Garros, Uimbldon, AQSh ochiq chempionati, Sankt-Peterburg, Dubay, Doha, Kuala-Lumpur va Toshkentdagi WTA turnirlarida qatnashaman.  Shuningdek, bu yil jahon reytingida kuchli yuzlikka kirishni maqsad qilganman. Bilaman, bu oson bo'lmaydi. Lekin men maqsad sari intilishdan to'xtamayman.
Sabina, tennisda, umuman sport olamida do'stlaringiz bormi?
Tennischi qizlarning barchasi bilan iliq munosabat va do'stona aloqada bo'lishga harakat qilaman. Lekin hozirgacha sport ichida ishongan va suyangan do'st orttira olmadim. Sababi tennisda hamma bir-biriga raqobatchi hisoblanadi. Hayotda esa Komila degan dugonamga qattiq ishonaman. U ham ilgari tennis o'ynagan va bir-birimizni yaxshi tushunamiz.
Kimga havas qilasiz va mashhur tennischilardan kimga qarshi o'ynashni istaysiz?
Faoliyatimni boshlagan vaqtda Mariya Sharapovaning o'yin uslubiga qiziqar edim. Lekin hozir men o'z o'yinimni shakllantirdim va boshqalarga havas qilmayman. Men o'zimning jismoniy holatim, imkoniyatim va salohiyatimdan kelib chiqib, o'z o'yinimni rivojlantirib borishim kerak.
Albatta, tennisda jahon reytingida kuchli yigirmalikka kirgan har qanday tennischi bilan o'ynashni istayman. Ilgari kuchli yuzlikka kirgan raketka ustalariga qarshi o'ynaganman.  Reytingning yuqori qismida turgan raketka ustalaridan ko'p narsa o'rgansa bo'ladi. Shu o'rinda, jahon tennisida ko'plab yutuqlarni qo'lga kiritgan Serena Uilyams va Mariya Sharapova bilan ham kortda uchrashishni orzu qilaman.
Tennisda Siz uchun noqulay raqib bormi?
To'g'risini aytsam, menga kortda to'rning narigi tomonida kim turganining farqi yo'q. Har bir uchrashuvda o'z o'yinimni ko'rsatishga katta e'tibor beraman. Ba'zan yutaman, ba'zida mag'lubiyatni tan olishga to'g'ri keladi. Raqiblarning kimligiga qarab o'ynashga o'rganmaganman. Keyin butun dunyoda tennischilar juda ko'p. Bir qizga qayta-qayta duch kelish holati deyarli uchramaydi. Shunga biror raketka ustasini men uchun noqulay raqib, deyolmayman.
Yutuq va mag'lubiyatni qanday qabul qilasiz?
Sportda g'alaba va mag'lubiyat yonma-yon turadi. Yutqazganimda aybni o'zimdan qidiraman va mag'lubiyatdan o'ziga yarasha saboq chiqarib, uni tez unitishga, keyingi turnirlarga puxtaroq tayyorlanishga harakat qilaman.
G'alabani ham oddiy qabul qilish kerak. Aslida tennis turnirlari taqvimi yutuqlarni uzoq nishonlashga imkon qoldirmaydi. Bitta musobaqada g'olib chiqqan bo'lsak, ertasiga boshqasiga etib borish uchun yo'lga tushamiz.
Yil davomida bir necha mamlakatga borasiz. Yosh qizga bu og'irlik qilmaydimi?
Safarlarda menga otam hamrohlik qiladilar. Menga oilam ko'p yordam beradi va qo'llab-quvvatlaydi. Ularsiz hozirgi natijalarga etisha olmasdim. Albatta, dunyo kezishning maroqli tomonlari bilan birga o'ziga yarasha qiyinchiliklari ham bor. Samolyotda uzoq uchish, boshqa mamlakat ob-havosi, iqlim o'zgarishlari, soatlardagi farq insonni charchatadi. Lekin bu mening hayot tarzimga aylandi. Sportni tanlaganimdan keyin bularga ko'nikishim kerak. Hozir safarlarda yurishni ancha o'rganib oldim.
Sabina, otangiz Alfred Sharipov professional futbolchi bo'lgan. Futbolga munosabatingiz qanday?
Men O'zbekiston terma jamoasining o'yinlarini katta qiziqish bilan tomosha qilaman. O'zimga Server Jeparovning o'yini yoqadi. Ko'pincha uyda otam futbol ko'rayotgan bo'ladi. Men ham ba'zan tomoshaga sherik bo'laman. Ilgari “Real”ga ham muxlislik qilganimni tan olaman. Otam “Chelsi”ning muxlisi. Shuningdek, Toshkentning “Lokomotiv” jamoasi meni g'alabalar bilan tabriklab turadi.
Faoliyatingizni hozirgacha bo'lgan qismidan qoniqasizmi va kelajakda qaysi turnirlarda g'alaba qozonishni istaysiz?
Faoliyatimdan o'zim qoniqaman. Sekin-asta ko'zlagan maqsadlarimga etib kelyapman. Yildan-yilga o'yinim o'syapti. Yangi yildagi eng katta maqsadim jahon reytingida kuchli yuzlikka kirish ekanini aytdim. ITF turnirlarida bir necha marotaba g'olib chiqdim. Endi navbat WTA turnirlarida ham bosh sovrinni qo'lga kiritish va “Katta dubulg'a” turnirlarida ishonchli o'yin ko'rsatishga keldi. Bu juda murakkabligini ham bilaman. Lekin ortga chekinib bo'lmaydi. G'alaba uchun timnimsiz mehnat qilish kerak.
Sabina SPORTS.uz axborot portaliga intervyu berishga vaqt topganing uchun katta rahmat.
— deya xabar beradi uff.uz nashri.