Ikkinchi yig'in boshlanganiga ham bir haftadan oshiq vaqt bo'lib qoldi. Bu davr oralig'ida jamoamiz a'zolari mashg'ulotlarda astoydil ter tukish bilan birga nazorat uchrashuvida ham ishtirok etishga ulgurishdi.
Futbolchilari kuniga ikki mahaldan mashg'ulot o'tkazizayotgani ta'kidlash joiz. Tarkibimizdagi o'zgarishlarga kelsak, safimizga yana bir yangi o'yinchi kelib qo'shildi.  O'tgan mavsumni Muborakning “Mash'al” jamoasi o'tkazgan Jamshid Hasanov tarkibimizga kelib qo'shildi. Ushbu yarim himoyachi bilan jamoamiz o'rtasida bir yillik bitim imzolandi.
Shuningdek mashg'ulotlarga yoshlar tarkibimizdan Doston Meliqo'ziev hamda Abror Rahmonovlar ham jalb qilindi. Bu esa jamoamizda yosh futbolchilarga bo'lgan e'tibor yuqori ekanligidan dalolat beradi.
Javohir Sidiqov salomatligini tiklab mashg'ulotlarga astoydil kirishdi.
Aytgancha, jamoamiz Otabek Zokirov bilan do'stona xayrlashdi. Otabek Navoiyning “Qizilqum” jamoasiga borib qo'shildi. Ketishidan oldin Otabek Zokirov jamoa rahbariyatiga va muxlislarga o'zining cheksiz minnatdorchiligini izhor qilishimizni iltimos qildi.
Biz ham o'z navbatida Otabek Zokirovning kelgusi faoliyatida omad tilab qolamiz.
Shuningdek, Jamoamiz navbatdagi nazorat uchrashuvini 14 yanvar kuni Bekobodning “Metallurg” jamoasiga qarshi o'tkazadi. Uchrashuv “Bunyodkor” akademiyasiga qarashli maydonda o'tkaziladi. O'yinning boshlanish vaqti soat 12:00 ga belgilangan.
Eslatib o'tamiz, vakillarimiz 8 yanvar kuni birinchi o'rtoqlik uchrashuvida “Paxtakor”ga qarshi maydonga tushib, 1:2 hisobida mag'lubiyatga uchrashgandi.
— deya xabar beradi uff.uz nashri.