Ispaniya kubogi doirasida bo'lib o'tgan «Sevilya» - «Real» (3:3) uchrashuvidan keyin «Qirollik klubi» sardori Serxio Ramos AS jurnalistlari bilan uchrashib, gazeta orqali andalusiyalik muxlislarga alohida murojaat qildi. Chunonchi, ular o'yin davomida o'z klublari sobiq himoyachisini rosa haqoratlashgandi. Xullas, quyida Serxioning gaplari keltirilmoqda. *** - Avvalo, aytishim kerak, penaltini «parashyut» uslubida bajarish bilan «Sevilya» ustidan kulganim yo'q. Darvozabon David Soriyadan meni kechirishini so'radim. Bunday zarba unga nisbatan hurmatsizlik emas. *** - O'yinning dastlabki daqiqalaridanoq men va onamga haqorat yog'diradigan sektorni yoqtirmayman, albatta. Ammo nima bo'lishidan qat'iy nazar, «Sevilya» - mening uyim. Yana unutmaslik kerakki, hozir «Real» sardoriman. Shunday ekan, bu klub sha'nini himoya qilish asosiy burchim sanaladi. *** - Doimo atrofimdagi odamlarga hurmat bilan yondashaman. Ammo bema'ni haqoratlarga o'ch kishilar mendan hech qachon yaxshi gap eshitmaydilar. O'ylashimcha, «Sevilya» prezidenti Xose Kastro barchasini o'rganib, tegishli chora qo'llashi lozim. Zero, o'zim mojaroni to'xtatishga urindim. Ammo muxlislar tinchlanish o'rniga yanada kuchliroq baqirdilar. Eh, ular «Sevilya» men uchun doimo uyimdek bo'lib qolishini nega tushunmaydilar? *** - Muxlislar Ivan Rakitich va Dani Alveshni mamnuniyat bilan qarshi olishlarini bilaman. Lekin nima uchundir menga nisbatan yomon munosabatdalar. Eng alamlisi, o'zim qolib, onamni ham haqoratlaydilar.  Ularning shu qiliqlari tufayli menda o'yin uslubini o'zgartirish istagi yo'qoladi... Davomi Interfutbol.uz saytida.
— deya xabar beradi uff.uz nashri.