Avval xabar berganimizdek, bugun “Navbahor” Toshkent yig'inidagi navbatdagi nazorat o'yinida maydonga tushdi. Uchinchi uchrashuvda futbolchilarimizga “Qo'qon-1912” jamoasi raqiblik qildi. Bugun poytaxtda yog'ingarchilik bo'lmaganligi sababli tomonlar kelishuvga ko'ra bahsni tabiiy chimli maydonda o'tkazishga qaror qilishdi. Shu sababli, uchrashuv “Oq-tepa” o'yingohida emas Qibraydagi maydonda o'tkazildi. Bir necha daqiqa oldin mazkur uchrashuv yakuniga etdi. 
Uchrashuv boshlarida futbolchilarimiz hisobni ochish imkoniga ega bo'lishdi. Ammo, Ro'zimboy Ahmedov raqib darvozasiga belgilangan penaltini aniq amalga oshira olmadi. Aniqrog'i ushbu vaziyatda Aziz Ashurov to'pni ushlab olishga erishdi. Oradan hech qancha vaqt o'tmay qo'qonliklar hisobni ochishdi. Raqibning goliga Suhrob Berdiev mualliflik qildi. Tez orada vakillarimiz hisobni tenglashtirishga erishishdi. Islom Isoqjonovning o'ng qanotdan uzatib bergan to'pini hujumda harakat qilgan Ravshan Xursanov darvozaga joylab qo'ydi.
Ikkinchi bo'lim boshida zaxiradan maydonga tushgan Alisher Mahmudov jamoamizni hisobda oldinga olib chiqdi. Mirzohid G'ofurov o'ng qanotdan uzatib bergan to'pini himoyachilar qaytargach, Mahmudov bir harakatda darvozaga joylab qo'ydi. Alisher uchinchi nazorat o'yinidagi uchinchi golini urganligini ham e'tirof etish joiz. Jahongir Mehmonov bo'lim o'rtalarida ikkinchi marta ogohlantirish olib maydonni tark etgach, uning o'rnini tomonlar kelishuvga ko'ra Ilhom Boydedaev egalladi. 2:1 hisobi o'yin hakami Zokir Qodirovning final xushtagi chalingunga qadar o'zgarishsiz qoldi va “Navbahor” uchinchi nazorat o'yinida g'alaba qozondi.  Yaqinda jamoamiz a'zosiga aylangan serbiyalik hujumchi Nemanya Yovanovich tibbiy ko'rikdan o'tganligi sababli uchrashuvda ishtirok etmadi.
Uchrashuvni jamoamiz quyidagi tarkibda o'tkazdi: Akmal  Tursunboev, Jahongir Mehmonov, G'iyos Komilov, Abbos Otaxonov, Hasanboy Ergashev, A'zam Aliev, Dilshod Jabborov, Ro'zimboy Ahmedov, Mirzohid G'ofurov, Islom Isoqjonov, Ravshan Xursanov. Zaxiradan maydonga tushganlar: Akmal Ortiqov, Tohir Shamsitdinov, Alisher Mahmudov, Abduaziz Sultanov, Azizbek Turg'unboev, Alisher Samatov, Alisher Mirzaev
— deya xabar beradi uff.uz nashri.