“Olmaliq” futbol klubining Antaliyada tashkil etilgan birinchi yig'ini yakuniga etdi. 11-25 yanvar kunlari oralig'ida o'tgan o'quv-mashg'ulot yig'inida 3ta o'rtoqlik o'yini tashkillashtirildi. Mashg'ulotlar kuniga ikki mahaldan olib borildi. Dastlabki xorij yig'ini yakunlangach, jamoa bosh murabbiyi Viktor Kumikovdan bu yig'in xulosalarini so'radik. Dastlabki xorij yig'ini o'z yakuniga etdi. Bu yig'indan ko'nglingiz to'ldimi? - Antaliyadagi birinchi o'quv-mashg'ulotlarimiz rejalashtirganimizdek o'tdi. Dastlabki kunlarda havo biroz sovuq, yomg'irli bo'lsada barcha mashg'ulotlar o'tkazildi. 3ta o'rtoqlik uchrashuvida maydonga tushdik. Unda 2 g'alaba va bir mag'lubiyat qayd etildi. Umumiy xulosa qiladigan bo'lsak bu yig'inda biz barchasini ko'ngildagidek o'tkaza oldik. Tarkib borasida qanday o'zgarishlar bo'ldi? Yig'in davomida ko'rikka kelgan legionerlardan ma'qul kelgani bormi? - Albatta, bu yig'in davomida bir qator xorijlik futbolchilar ko'rikda bo'lishdi. Hozircha serbiyalik Igor Yelich bilan kelishuvga erishdik. Uning maydondagi harakatlari bizga ma'qul keldi. Qolganlari borasida bir to'xtamga kelmadik. Antaliyadagi ikkinchi yig'inda ham ko'rik davom etadi. Ikkinchi yig'in qachondan boshlanadi? - Futbolchilarga bir necha kun dam beramiz. Jamoa a'zolari 30 yanvar kuni yana Antaliyaga etib kelishadi. Navbatdagi yig'in 20 fevralga qadar davom etadi. Bu oraliqda mashg'ulotlar bilan birga 5ta o'rtoqlik o'yini o'tkazamiz. Shundan so'ng jamoa Toshkentga qaytadi va mavsum boshlangunga qadar mashg'ulotlar o'sha erda davom ettiriladi. Jamoa a'zolari ertaga 26 yanvar kuni Antaliya - Istambul - Toshkent yo'nalishida ortga qaytishadi.
— deya xabar beradi uff.uz nashri.