Xabaringiz bor, 2017 yilgi mavsumdan boshlab  O'zbekiston XXVI milliy chempionati birinchi ligasida Surxondaryo viloyati sharafini «Surxon» (Termiz) futbol klubi himoya qiladi.
Bu klub o'tgan mavsumda Jarqo'rg'oning «Neftchi» va viloyatning boshqa jamoalari tarkiblarida to'p surgan mahalliy futbolchilar hisobiga shakllantiriladi.  Ayni chog'da Termizda professional futbol klubi faoliyatini to'g'ri yo'lga qo'yish borasida bir qator ishlar amalga oshirilmoqda. Surxondaryo viloyati hokimligi hamda «Surxon» PFK rahbariyati jamoa a'zolari uchun qulay shart-sharoitlar yaratish uchun barcha imkoniyatlarni ishga solyapti.
O'zbekiston Professional futbol ligasi talablariga ko'ra, har bir futbol klub o'z ramzi (logotipi) va bayrog'iga ega bo'lishi lozim. Shuni hisobga olgan holda «Surxon» PFK rahbariyati jamoa uchun logotip yaratish maqsadida tanlov e'lon qiladi. Tanlovda professional dizaynerlardan tashqari istagan futbol muxlisi o'z ijodiy ishlari bilan qatnashish huquqiga ega.
Ma'lumot uchun aytish kerakki, yaratiladigan yangi logotipda futbol elementlari bilan bir qatorda Surxondaryo viloyati, shuningdek, ko'hna va hamisha navqiron Termiz shahri timsolini ifodaluvchi belgilar ham aks etishi talab etiladi. Kelasi yili “Surxon” jamoasi tashkil topganligining roppa-rosa yarim asrlik to'yi nishonlanadi. Vohaliklar mavsumni o'zlarining an'anaviy sariq va ko'k liboslarida o'tkazishi rejalashtirilmoqda. Logotipni yaratishda ushbu jihatlarga ham e'tibor qilinsa ayni muddao bo'lardi.
Tanlov 12 fevralga qadar davom etadi. Yakunda taqdim etilgan ijodiy ishlardan eng ma'qul va munosibi “Surxon” professional futbol klubi logotipi uchun tanlab olinadi.
Tanlovda g'olib chiqqan muallif futbol klubi ma'muriyati tomonidan moddiy rag'batlantiriladi.
Murojaat uchun telefon: +998907474777.
O'z ijodiy ishlaringizni quyidagi elektron pochta manziliga jo'natishingiz mumkin: [email protected]
Barchani tanlovga taklif etamiz.

— deya xabar beradi uff.uz nashri.