Toshkentning “Obod” jamoasi bosh murabbiyi Rauf Inileev jarrohlik stoliga yotdi. Yanvar oyining ikkinchi o'n kunligida oyog'idagi muammolar sababli tibbiy ko'rik uchun Rossiya poytaxti Moskvaga uchib ketgan Rauf Inileev jarrohlik stoliga yotdi. Avvalgi rejaga ko'ra, Rauf Talgatovich shifokorlar ko'rigida bo'lishi va davolanib, 25 yanvar kuni O'zbekistonga qaytishi lozim edi, biroq rossiyalik shifokorlar tajribali mutaxassisga jarrohlik stoliga yotishni tavsiya qildi. 31 yanvar kuni jarrohlik amaliyoti bo'lib o'tdi va aytish kerakki, hozir hammasi joyida. Rauf Talgatovichning sog'lig'i borasida hech qanday muammo yo'q. Jamoamiz bosh murabbiyi shu kunlarda shifoxonada bo'lib turibdi. Tez orada mutaxassis O'zbekistonga qaytadi va klubdagi ishini davom ettiradi. “Turli mish-mishlarga chek qo'yish maqsadida aytib o'tmoqchimiz, Rauf Inileev “Obod”ni tark etgani yo'q. Aksincha, klub mutasaddilari jamoa ustozini shunday vaqtda har tomonlama qo'llab-quvvatlashga harakat qilyapti”, – deyiladi klub matubot xizmatining xabarida. 
— deya xabar beradi uff.uz nashri.