Edinson Kavani mashhur Pedro Pauleta natijasini takrorladi, biroq hamon Zlatan Ibragimovichdan ortda boryapti. Urugvaylik to'purar Evropada hammadan ko'p gol urmoqda, biroq hattoki, hamyurti Luis Suareschalik ham e'tirof etilmayapti. Interfutbol.uz saytining quyidagi maqolasi aynan xizmatlari etarli darajada baholanmayotgan baquvvat hujumchi - «Matador» haqida. Zlatandan o'tib ketadigan yigit «PSJ» tarixidagi eng yaxshi to'purar maqomi uzoq vaqt 20 yillik rekordni yangilagan Pedro Pauletaga tegishli bo'ldi. U chindan ham, zo'r o'ynardi, biroq hech qachon dunyo miqyosida mega-yulduz sanalgan emas. Xullas, portugaliyalik hujumchi 211ta o'yinda 109ta gol urgancha «PSJ» «shohi»ga aylangandi. Bu uning o'rtacha hisobda har bir o'yinda 0,52 gol hosil qilganiga dalolat - asr boshi uchun yomon natija emas. Biroq Pedro rekordini «qulatgan» hujumchida ushbu ko'rsatkich yanada balandroq - 1ta o'yinda 0,87 gol. Boz ustiga, janobi Ibragimovich o'z hisobidagi 50ta golni parijliklar bilan xayrlashuv mavsumida nishonladi. Biroq shved goleadori Edinson Kavanidan naq 6 yosh katta. Aytish joiz, urugvaylik hujumchi Pauleta natijasini takrorlashga ancha kam vaqt sarfladi. To'g'rirog'i, 109ta gol marrasini Pedroga nisbatan tezroq zabt etdi. Ha, unda samaradorlik koeffitsienti Zlatannikiga qaraganda, past - 1ta o'yinda 0,62ta gol. Lekin klub tarixidagi ikkinchi goleador bo'lish ham katta natijadir. Qolaversa, unda to'purarlar ro'yxatining 1-o'rniga chiqish uchun imkoniyat ham, vaqt ham etarli. Ayniqsa, hozirgi samaradorligini hisobga olsak. Kavani joriy mavsum barcha turnirlar hisobidan 28ta o'yinda 29ta gol urdi - aqlni shoshirib qo'yadigan natija. Vaholanki, Parijda Edinson mudom e'tirozlar domida yuradi va o'zi yangi klub qidirayotganini hech qachon yashirgan emas. Eng diqqatga sazovor tomoni, urugvaylik hujumchi ketma-ket 7 yildan buyon 25tadan kam gol urayotgani yo'q.  Shulardan 5tasida esa, 30ta gol marrasidan oshdi. 7 yil - bu futbolda katta muddat va saviya belgisi. Urugvaylikni etakchilik masalasida Ibragimovich bilan taqqoslash noo'rin, ammo u raqib darvozasi tomon doimo yo'l topadi. 1,5 yilcha avval Kavanining otasi - Luis uning kayfiyatini juda pasaytirib yuborgandi. Ya'ni mast holda avtomobil boshqarib,  19 yoshli mototsiklchi hayotiga zomin bo'ldi. Natijada Edinson o'zini o'nglab olish uchun biroz tin oldi. Zero, himoyachilar uni izdan chiqarishga urinishgandi: «Otang 20 yilga qamaladi. U qotil». Futbolchining bunday vaqtlarda odatiy maromda ishlashi juda qiyin. Lekin vaqt har qanday dardni davolaydi, agarda inson xarakteri kuchli bo'lsa... Jahonning eng qadrlanmagan hujumchisi? Davomi: www.interfutbol.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.