“Lokomotiv” bu mavsum Osiyo chempionlar ligasi musobaqasini safarda “Al Taavon”ga qarshi bahs bilan boshlaydi. “Temiryo'lchilar” 20 fevral kuni Burayda shahridagi “King Abdullah Sport City Stadium”da Saudiya klubiga qarshi maydonga tushishadi. OChL-2017dagi birinchi raqibimiz “Al Taavon” ayni paytda Saudiya Pro-ligasida 6-o'rinni egallab turibdi. Bu jamoa o'tgan mavsumni 4-o'rinda yakunlagan. 3-o'rinni qo'lga kiritgan “Al Ittihod” OFK litsenziyalash tartibidan o'ta olmagani uchun musobaqadan chetlatilgan va o'rniga “Al Taavon”ga ishtirok etish ruxsati berilgan. “Al Taavon” bu yil o'z tarixida birinchi bor Osiyo chempionlar ligasida ishtirok etadi. Jamoa uy uchrashuvlarini Burayda shahridagi “King Abdullah Sport City Stadium”da o'tkazadi. Stadion sig'imi 23,600 tomoshabinga mo'ljallangan. O'tgan mavsumdagi to'rtinchi o'rin jamoa tarixidagi eng yaxshi natija hisoblanadi. “Al Taavon”ning asosiy futbolchilaridan biri jamoa sardori Jehad Al Husayn hisoblanadi. U klubga 2014 yil “Dubay” jamoasidan kelgan va oxirgi ikki yil ichida eng ko'p golli to'p uzatgan futbolchi bo'lib turibdi. Suriyalik 34 yoshli futbolchi 2002-2011 yillar oralig'ida Suriya terma jamoasi safida 90ta o'yinda maydonga tushgan. U katta tajribaga ega futbolchi. Jamoa himoya chizig'ida Talab Al Absi katta ishni bajaradi. U 2015 yil “Al Ittihod” klubidan kelib qo'shilgan. O'z vaqtida “Ayaks”, “Fiorentina” kabi klublarda to'p tepgan hujumchi Munir El Hamdui esa hujum chizig'ida eng xavfli futbolchilardan biri hisoblanadi. Marokashlik hujumchi “Al Taavon” tarkibiga Qatarning “Umm Salal” klubidan kelib qo'shilgan. Jamoa bosh murabbiyi – Ruminiyalik Konstantin Galsa. 1972 yilda tug'ilgan ruminiyalik murabbiy o'z vaqtida Ruminiya U-17 terma jamoasi, “Styaua” (Buxarest) hamda “Espanol” (Ispaniya) klublarida faoliyat olib borgan. U o'tgan yilning oktyabr oyidan beri “Al Taavon”ni boshqarib kelmoqda. Konstantin Galsa 1994 va 1998 yilgi jahon chempionatlarida Ruminiya terma jamoasi safida maydonga tushgan.
— deya xabar beradi uff.uz nashri.