Bundan biroz vaqt oldin Qibraydagi o'quv-mashg'ulot bazasi maydonida “Navbahor” va “Surxon” jamoalari o'rtasidagi nazorat o'yini o'tkazildi. Toshkent yig'ini so'nggidagi uchrashuvda futbolchilarimiz 3:0 hisobida g'alaba qozonishdi. Birinchi bo'lim o'rtalarida Mirzoxid G'ofurov boshlangan hujumni samarali yakunlab hisobni ochdi. Termizliklarda tez orada hisobni tenglashtirish imkoni yuzaga kelgandi. Lekin, “Surxon” futbolchisi darvozamizga belgilangan penaltini aniq amalga oshira olmadi. Ushbu vaziyatda to'p yo'nalishi noaniq ketdi. Tanaffusga oz vaqt qolganida Nemanya Yovanovich o'ziga ishlatilgan qo'pollik uchun chiday olmay raqibiga e'tiroz bildirgani uchun hakam tomonidan qizil kartochkaga loyiq topildi. Nazorat o'yini bo'lganligi sababli serbiyalik hujumchi o'rnini Abduaziz Sultanov egalladi. Birinchi bo'limda G'ofurovning goli yagonaligicha qoldi. Ikkinchi bo'limda futbolchilarimiz raqib darvozasini ikkinchi bor nishonga olishdi. Mirzohid G'ofurov raqib posboni bilan yakkama-yakka vaziyatga chiqib borayotgan bir pallada chalib yiqitildi. Natijada “Surxon” darvozasiga penalti belgilandi. 11 metrlik jarima zarbasini Oybek Qilichev aniq amalga oshirdi. Oradan biroz vaqt o'tib Qilichev Timur Tolipovni gol urishiga sharoit yaratib berdi. Tolipov esa yakuniy zarbani berishda xatolikka yo'l qo'ymadi – 3:0. Uchrashuvda «Navbahor» tarkibi quyidagicha bo'ldi: Asilbek Amanov, Darko  Stanoevich, G'iyos Komilov, Alisher Samatov, Tohir Shamshitdinov, A'zam Aliev, Alisher Mirzaev, Oybek Qilichev, Mirzohid G'ofurov, Timir Tolipov, Nemanya Yovanovich. Zaxiradan maydonga tushganlar: Akmal Ortiqov, Abduaziz Sultanov, Jahongir Mehmonov, Abbos Otaxonov, Ilhom Aliboev, Hasanboy Ergashev.
Shu tariqa «Navbahor»ning Toshkentda o'tkazilgan mashg'ulotlari yakuniga etdi. Endi «Navbahor» a'zolari ikki kunlik dam olishdan keyin 28 fevral kuni Namanganda to'planib, tayyorgarlikning yakuniy bosqichini boshlashadi. «Navbahor» chempionatning dastlabki turida 4 mart kuni Toshkentning “Obod” klubini qabul qiladi.
— deya xabar beradi uff.uz nashri.