Osiyo Chempionlar Ligasi “S” guruhi 2-turidan o'rin olgan “Bunyodkor” – “Al-Ayn” uchrashuvni oldidan tashkil etilgan matbuot anjumanida dastlab amirliklar bosh murabbiyi Zoran Mamich hamda hujumchi Danilo Asprilla ishtirok etdi. “Bizni qiyin o'yin kutib turibdi. “Bunyodkor” shakllangan jamoa, ular jamoaviy o'yin orqali yaxshi natijaga erishadi. Dastlabki turda “Zob Ahan”ga qarshi o'yinda ochko yo'qotdik, ammo ertaga g'alaba qozonish uchun harakat qilamiz, maqsadimiz shundan iborat. “Bunyodkor” tarkibida Shahzodbek Nurmatov, Dostonbek Hamdamov va Eldor Shomurodov xavfli futbolchilar sanaladi.  “Al-Ayn”  himoyadan o'ynamaydi, biz raqibga nisbatan ko'proq gol urishga harakat qilamiz. Raqib sifatli o'yin namoyish qilsa-da, ertaga g'alaba uchun maydonga tushishimizni yana bir bor aytib o'tmoqchiman. Bo'lajak o'yinda kim favorit ekanini aytish qiyin”, – dedi Zoran Mamich. “O'yin juda muhim ekanini murabbiy ham aytdi. Ertangi o'yinga tayyormiz, g'alaba qozonishimiz kerak. “Bunyodkor” safida  kuchli futbolchilar bor, ammo maqsadimiz faqat g'alaba”, — dedi Asprilla. Eslatib o'tamiz, “Bunyodkor” va “Al-Ayn” o'rtasidagi uchrashuv ergata, 28 fevral kuni Toshkentdagi “Bunyodkor” stadionida bo'lib o'tadi. O'yin 18:00 da start olishi rejalashtirilgan.
— deya xabar beradi uff.uz nashri.