Xabaringiz bor, bu yil ilk bor futzal bo'yicha U-20 Osiyo chempionati bo'lib o'tadi. Ushbu musobaqa 16-26 may kunlari Tailand mamlakatida o'tkaziladi. O'zbekiston futzal Assotsiatsiyasi ana shu musobaqaga munosib tayyorgarlik ko'rish maqsadida yosh o'yinchilar uchun tanlov e'lon qiladi. Tanlovda 1997, 1998 va 1999 yillarda tug'ilgan yoshlar qatnashishlari mumkin. Tanlovda ishtirok etish uchun faqatgina Toshkentga kelish talab etiladi. Tanlov 11 mart kuni Toshkentdagi "O'zbekiston" sport majmuasida bo'lib o'tadi. Uni O'zbekiston U-20 terma jamoasi bosh murabbiyi Xose Mariya Mendezning shaxsan o'zi o'tkazadi. Ispaniyalik mutaxassis kun davomida ishtirokchilarni turli xildagi mashqlar va test-sinovlari orqali ko'zdan kechiradi. Tanlovda o'zini ko'rsatganlar saralab olinadi va keyinchalik futzal bo'yicha O'zbekiston U-20 terma jamoasi yig'iniga jalb etilishi mumkin. Bugungi kunda futzali rivojlangan mamlakatlar bu metodikadan doimiy tarzda foydalanib kelmoqda. Tanlovda mamlakatimizning istalgan hududidan yoshlar qatnashishlari mumkin. 11 mart kuni Toshkentdagi "O'zbekiston" majmuasida 10:00dan boshlanadigan tanlovda o'zingizni ko'rsating va sizda futzal bo'yicha yoshlar terma jamoasi a'zosiga aylanish imkoni paydo bo'ladi. Murojaat uchun telefonlar:
+99894 6323366
+99893 1814111
— deya xabar beradi uff.uz nashri.