Oliy Liga 1-turidan o'rin olgan “Paxtakor” – “Qizilqum” (3:1) uchrashuvidan keyin mezbonlar bosh murabbiyi Grigoriy Kolosovskiy uchrashuv to'g'risida fikrlarini bildirib o'tdi. “Mavsum endi boshlangan bo'lishiga qaramay, jamoalar tezkor va hujumkor futbol namoyish qilishdi. O'z maydonimizda to'p tepganimiz uchun ishtiyoq yuqori edi. G'alabaga erishishimizda bu muhim ahamiyat kasb etdi. O'yinimizda xatolar ham uchradi. Bularni tahlil qilib o'tamiz. Hakimov jamoaviy o'yinda yaxshi ishtirok etdi. To'p uchun kurashda oxirigacha intildi. Jamoa uchun foydali ish bajardi. Sergeev va Sohibov oxirgi nazorat uchrashuvida jarohat olishdi. Igor kelasi bellashuvda jamoaga yordam bera olishiga umid qilaman. Akademiya tarbiyalanuvchilariga hamisha e'tibor berib kelamiz. Bugun 17 yoshga to'lmagan G'anixonov  debyut qildi. U iqtidorli futbolchilarimizdan biri. Tarkibda imkoniyatlari yuqori yoshlar etarli. Ularga asta-sekinlik bilan imkon beramiz”, – dedi Grigoriy Kolosovskiy. 
— deya xabar beradi uff.uz nashri.