2015 YIL DAVOMIDAGI ENG XARIDORGIR FUTBOLKALAR
Futbolchilarning muxlislar orasidagi mashhurligini ularning formalariga nisbatan talab darajasiga qarab ham aniqlash mumkin. Xo'sh, joriy yil qaysi yulduzlarning futbolkalari savdosi chaqqon bo'lyapti? Quyida o'yinchilik formalari eng xaridorgir 10 nafar muxlislar yoqimtoyi haqida so'z boradi.
10. Shinji KAGAVA
Yaponiyalik yarim himoyachi 2012 yili Dortmund «Borussiya»sini «MYu» bilan almashtirgan vaqt uning futbolkalari sotuvi misli ko'rilmagan darajada chaqqonlashdi. Kagava «qizil iblislar» safida 38 marta maydonga tushib, 6ta gol urdi. Xususan, «Norvich» bilan bahsda «xet-trik»ka erishdi. Biroq umumiy qaraganda, Angliyada chinakamiga shuhrat qozonolmadi. Natijada 2014 yilning yozida yana Dortmundga qaytdi. Shunday bo'lsada, uning futbolkalariga hamon talab juda yuqori.
9. Fernardo TORRES
Ispan hujumchisining har bir transferi kosmik summani o'z ichiga olgan. Deylik, uning Madrid «Atletiko»sidan «Liverpul»ga o'tishi uchun to'langan 26,5 mln. funt mersisaydliklar tarixidagi eng yirik xarajat bo'lgandi. Roman Abramovich esa, Fernandoning «Chelsi» safida ko'rish uchun naq 50 mln. funt bahridan kechdi. Futbolchining 9-raqamli ko'k rangli formasi xuddi qaynoq pishiriqlar kabi sotilib ketgan bo'lsada, uning o'zi Londonda uncha yaxshi taassurot qoldirolmadi. To'g'ri, ispaniyalik forvard «Chelsi» safida ChL-2012 g'olibiga aylandi, ammo 110ta o'yinda atigi 20ta gol urish bilan cheklandi. Xullas, «Atletiko» va «Liverpul»dagi Torresning soyasiga o'xshab ko'rindi. Mana, u yaqinda «Milan»dagi qisqa muddatli ijara kelishuvidan so'ng yana jonajon «Atletiko»siga qaytdi. Hujumchi hamon «roxiblankos» fanatlari orasida katta obro'-e'tiborga ega. Qisqasi, «matraschilar»ga tarafkashlik qiluvchilar uning futbolkasini to'xtamay xarid qilaveradilar.
8. Serxio AGUERO
«Manchester Siti»ga muxlislik qila turib, Agueroga tegishli futbolkaga ega bo'lmaslik mumkin emas. Argentinalik goleador 2006 yili «Atletiko»dan «shaharliklar» safiga o'tganidan buyon jahondagi eng ilg'or hujumchilardan biri ekanligini isbotladi va «Manchester Siti» muzeyi bir qator sovrinlar bilan boyishiga etarlicha hissa qo'shdi. Ayni kunlarda to'lib-toshayotgan «Ittihod» arenasida ortida «Aguero» yozuvi bor futbolkaga burkangan muxlislar haddan ziyod ko'p. Qisqasi, klub fanatlari asosan argentinalikning formasini sotib olishyapti. To'g'ri, ular David Silva va Vensan Kompanining futbolkalariga ham befarq emaslar, ammo Agueronikiga baribir, boshqacha mehr bilan qarashadi.
7. NEYMAR
Braziliyalik vunderkind 2013 yili «Barselona» safini to'ldirib, debyut mavsumida ishonchni to'la oqlolmadi. Harqalay, matbuotchilar va muxlislar uni ayovsiz tanqid qilishdi. Neymar esa barchasiga xotirjam qarab, tezda yangi muhitga moslashib oldi. Xususan, mavsum-2014|2015ni juda yaxshi o'tkazib, futbol olamidagi eng shiddatkor hujumchilar uchligiga kirdi. Ya'ni Neymar-Messi-Suares triosi birgalikda 122ta gol urdi. Shunga yarasha, braziliyalikning mashhurligi ortdi va futbolkalari qo'lma-qo'l bo'la boshladi.
Davomi InterFUTBOL gazetasi blogida.
— deya xabar beradi uff.uz nashri.