Xitoy chempionatidagi vaziyat O'zbekiston milliy termasiga bevosita ta'sir ko'rsatishi mumkinligi haqida gaplashgandik, yodingizdami? Chamamda o'sha kunlar etib keldi.
Rostini aytganda, Xitoy futbolidagi rahbarlardan biroz ko'nglim qoldi. Futbolga sarf etilayotgan millionlar evaziga ular mamlakat futbolini ko'tarishga harakat qilayotgani tushunarli. Biroq katta doiralarda xushyorlik va bosiqlik zarar qilmaydi. Ular esa chempionat yakuniga taxminan 1 oy (!) vaqt qolganida keskin qaror qabul qildi — 2017 yilgi mavsumdan boshlab mamlakat Super ligasi klublari maydonga bir vaqtning o'zida faqatgina uch legionernitushirishi mumkin.
O'zingiz o'ylang, Xitoyda malakali mutaxassislar faoliyat olib bormoqda. Skolaridan tortib, Villash-Boashga qadar kamida bir yillik rejasini aniq qilib oladi. Shu boisdan ular eski reglamentdan kelib chiqdi hamda besh nafardan xorijlik futbolchini o'z safiga qo'shib olishga harakat qildi. Yuqoridagi qaror esa ularga o'xshagan bir qator murabbiylarning rejalarini keskin o'zgartirib yubordi.
To'g'ri, millionlarga bemalol ko'z yumib ketayotgan Xitoy klublari bir yoki ikki ortiqcha legionerni maosh bilan ta'minlab, kambag'al bo'lib qolmaydi. Bu ular uchun karnaychidan bir pufdek bo'lishi katta ehtimol. Biroq Odil Ahmedov kabi futbolchilari bir qo'lning barmog'i bilan sanagulik O'zbekistondek termalar uchun o'sha qaror aks ta'sir ko'rsatishi ham mumkin.
Samvel Babayan Xitoy Super ligasida to'p surayotgan uch futbolchiga yaxshigina ishonch bildiradi, to'g'rimi? Yaqin orada Anzur Ismoilov va Egor Krimetsdan tashkil topgan markaziy himoya o'zgarishiga ko'pchilik ishonmasdi. O'zidan avvalgi mutaxassislardan farqli o'laroq Babayan kerak bo'lsa Islom To'xtaxo'jaevni o'ng qanotga o'tkazib yuborgandi shu tandemga joy ochish uchun. Biroq legionerlar limitidagi o'zgarishlar ulardan birining faoliyatiga ta'sir ko'rsatishni boshladi. Super liganing ilk turida Krimets qaydnomaga ham kiritilmadi.
Buning sababi men uchun qorong'u. Aytaylik, Krimetsda kichik jarohat bor bo'lishi va u keyingi o'yinlardan maydonda ko'rinishi berishi mumkindir. Hozirgi holatdaundagi kichik jarohat ham tashvishga solsa-da, ko'z yumib turaylik. Agar ikkinchi taxmin o'rinli bo'lib, Krimets qolgan uch legioner soyasida qolib ketadigan bo'lsa, u endi o'yin amaliyotisiz qolishga ham majbur bo'ladi.
“Beydzing Guoan” 1-turda amaldagi chempion “Guanjou Evergrand” mehmoni bo'lib, 1:2 hisobida engildi. Turkiyalik Burak Yilmaz jamoasining yagona goliga mualliflik qildi. U o'tgan mavsum yarmida Pekinga kelib, ketma-ket gollar ura boshlagandi. Shu sababli ham “Beydzing Guoan” O'zbekiston milliy terma jamoasi hujumchisi Igor Sergeevni tinchgina ortiga qaytarib yubordi.
Endi qarang, Krimetsgarchi himoyachi bo'lsa-da, legioner futbolchilar limiti sabab u hujumdagi Burak Yilmaz bilan ham raqobatlashishga majbur. Futbolda himoyalanib zafar quchishdan ko'ra, gol urib yutish osonroq. Qolaversa, Yilmaz Turkiya termasida etakchilardan biri, Evropa futboli havosini olgan, gol urishdan tinayotgani yo'q. Shunday bir paytda O'zbekiston milliy termasining-da etakchisi bo'lmagan Krimetsga ishonch bildirilishi menimcha qiyin. Qolgan ikki legioner esa braziliyalik: Renato Augusto va Ralf. Ispaniyalik bosh murabbiy mana shu futbolchilarni ham Guanjouda maydonga tushirdi. Shu kuni qaydnomaga kiritilmagan bo'lsa-da, jamoada ispaniyalik hujumchi Soriano ham borligini unutmaslik kerak.
Odil Ahmedovda esa vaziyat boshqacharoq. U Osiyo Chempionlar ligasi o'yinlarida to'liq o'ynadi. Osiyolik legioner uchun alohida ajratib qo'yilgan kvota sabab uning bu boradagi imkoniyati braziliyaliklardan ko'proq. Biroq ichki chempionat haqida gap ketganida vaziyat chatoq. Villash-Boash Ahmedovga imkoniyat berishi uchun Oskar, Xalk yoki Elkesendan biriga dam berishi kerak. Portugaliyalik mutaxassis nima qilsin? Agar Xitoy futboli rahbarlari qarorni ertaroq chiqarganida balki Ahmedov umuman Xitoyga yo'l olmay, “Krasnodar”da ham qolishi, Evropa ligasida Ispaniyaga borib, “Selta”ga qarshi o'ynashi ham mumkin edi. Villash-Boash uni osiyolik legioner limitiga ishonib taklif qildi, endi esa o'zining ham boshi qotib qolgan.
Ilk turda “Shanxay SIPG” 5:1 hisobida zafar quchdi. Xalk 1 ta gol urdi, Oskar 1 ta golli pas berdi, Elkesen xet-trik qayd etdi. Mana shu trio Chempionlar ligasida ham asosiy rolni o'ynamoqda. Ahmedov uchun Villash-Boash qaysi futbolchini zaxiraga o'tkazishi kerak? Yoki hammamiz bir bo'lib, braziliyaliklardan biri “ishdan chiqishi”ni so'rab duo qilishimiz shartmi?
Bu albatta hazil. Futbolchilarning hammasida bosh omon bo'lsin. Ahmedov-ku termaning haqiqiy etakchisi, qolaversa Chempionlar ligasi orqali ancha o'ziga kelib oldi. Biroq Krimets-chi? O'yin amaliyoti bo'lmasa ham Babayanning asosiy tarkibiga kirarmikin yoki boshqa variant chiqib qoladimi?
Menga Server Jeparovning ishi yoqdi. “Istiqlol” oldinroq “qovun tushirgan”i uchun, Jeparovni majburan olib turmadi va “Sepaxon”ga ijaraga berdi. Server o'yinlarda maydonga tushib, gol urishga ham erishdi. Balki Krimets ham bu haqda o'ylab ko'rayotgandir. Yoki Sergeevga o'xshab Babayanning iltimosiga ko'ra Toshkentga qaytib kelarmikin katta maoshdan yuz burib?
Diyor IMOMXO'JAEV, «Erudit SPORT» gazetasi
— deya xabar beradi uff.uz nashri.