Bu galgi qahramonimiz o'ta noyob (balki umuman tengi yo'q!) sulola vakilidir. Uning oilasi 100 foiz bitta soha etagini tutganlardan tashkil topgan. Ota va ona hamda 4 nafar o'g'il - barchasi futbolchi! Ha, hikoyamiz belgiyalik Azarlar oilasining ikkinchi farzandi Torgan haqida. «Chelsi» etakchilaridan biri Edenning ukasi ELda «Fiorentina» oldiga «shlagbaum» qo'ygan «Borussiya»da o'z mavqesini sekin-asta mustahkamlamoqda. Taxmin qilish mumkinki, yaqin kelajakda qaysidir top-chempionat Azar nomli «konveyer»ning sifatli «mahsulot»lari hisobiga kuchayishi mumkin. Zero, Eder va Torganning ikki nafar ukasi ham aynan futbolchilik qismatini tanlagan. Qon bilan kirgan futbol Kiran va Terri Azar professional futbolchilar ota-onasi sifatida tanilishdan oldin o'zlari ham millionlar o'yini bilan jiddiy shug'ullanishgan. Deylik, Terri vaqtida Belgiyaning «Brenua», «La-Luver» va «Tyubiz» klublarida to'p surgan. Katta Azarning eng katta yutug'i - jamoasi safida Belgiya ikkinchi ligasiga chiqqani. Shuningdek, u Kiran bilan  tanishganini ham shaxsiy muvaffaqiyati sifatida tilga olishga haqli. Tabiiyki, ularning yo'llari aynan futbol tufayli kesishgan. Kiran o'sha payt Belgiyaning «Brem Kompte» ayollar jamoasi tarkibida to'p surardi. Terri esa mazkur klub o'yinlarini tez-tez bevosita stadionda kuzatardi. Keyinchalik  ular turmush qurishdi va bo'lajak ona homiladorlikning 3-oyi futbolchilik faoliyatini butunlay chetga surib, bor etiborini to'ng'ich farzandining dunyoga kelishiga qaratdi. Kiran ayni o'sha damlar futbolda o'zi uchun armonga aylangan nurli cho'qqilarni farzandlari zabt etishlarini tilagan bo'lsa, ajabmas. Xullas, futbolchilar oilasida avval Eden, yana 3 yildan keyin Torgan tug'ildi. Er-xotin farzandlariga ism tanlashda ortiqcha bosh qotirib o'tirmadilar - keyingi o'g'illari, ya'ni bo'lajak futbolchilarga Itan va Kilian nomini berishdi. E'tiborli jihati, har ikkisi yoshligidayoq aynan ota-onasi va akalari izidan borishga ahd qilgan. Misol uchun, Kilian hozir Vengriyaning «Uypesht» klubida to'p surmoqda. Torganning professional faoliyati esa Frantsiyaning «Lans» jamoasida boshlandi. Xuddi Azar «Lill»da o'ynash orqali «Chelsi» e'tiborini tortganidek, u ham kamtarin jamoada mahoratini oshirib bordi. Natijada Edenni «nishon»ga olgan «aristokratlar» uning ukasini ham Londonga taklif etishdi. Biroq akasidan farqli ravishda, Torganni o'yin amaliyoti hosil qilishi uchun «Tsulte Varegem»ga jo'natishdi - ijara kelishuvi. Yosh futbolchi bu qarorga to'g'ri yondashdi. Umuman, u akasining muvaffaqiyatlariga hasad qilmaydi. Aytishicha, aka-ukalarni o'zaro taqqoslash bema'nilikdan o'zga narsa emas: «Bizni o'zaro solishtirishdan ma'no yo'q. Chunki akam daho, men esa hozircha hech kim... Buni to'g'ri qabul qilish kerak. Hech qachon akamning mahorati va yutuqlariga nisbatan hasad tuyg'usini his etmaganman, aksincha, uning muvaffaqiyatlari bilan faxrlanaman. Shuning barobarida futbolda o'z yo'limni topishga intilaman». Intilganga tole yor. Torgan Belgiya chempionatida shaxsiy mahoratini maromiga etkazdi. Xususan, 2013 yili yupiler-liganing eng yaxshi to'purariga atalgan «Oltin butsa» sovrinini qo'lga kiritdi. Shuningdek, yilning eng yaxshi futbolchisi sifatida tan olindi. Ammo «Chelsi»ga qaytgani hamono «Borussiya» (Menxengladbax)dan taklif oldi va Germaniya bundesligasi tomon yurish boshlashni paysalga solmadi. Yangi jamoada belgiyalik hujumchiga 26-raqamli futbolka topshirildi. Bundes-stayl Davomi: www.iff.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.