Tanish-bilish, notanishlarni “Aka muxbirsiz, nega terma haqida tanqidiy maqola yozmaysiz?” - degan gaplari yurakni siqadi. “E-e, oshna futbolimizni tanqid qilmagan kim qoldi o'zi?” deb savoliga, savol bilan javob qaytarging keladi-yu... Rostdan ham bu qurmagur o'zbek futboli muxlis, jurnalist, yozuvchilarni istagan paytida kesak otadigan joyiga aylangan.
Atoqli yozuvchimiz ularni qo'shga solib dalaga haydash kerak deydi, qiziqchilarimizniku qo'yavering... Hozirda, har qanday kulgu kechasi dasturini san'atkorlar ta'biri bilan aytganda “eng eydigan joyi” futbol mavzusi bo'lib qolgan.
Ba'zida “Tanqid kelajak mevasi” degan hikmat futbolga to'g'ri kelmas ekan, deb o'ylab qolaman. Bo'lmasa, so'ngi yigirma yil davomida o'sha millionlar o'yini vakillariga berilgan dakki, dashnomlarga bodring ham qizarib ketgan bo'larmidi. Futbolimizni “millionlar o'yini” degan joyiga ham alohida urg'u berib qo'yish kerak! Voha, vodiyda stadionlarga hartugul ishqiboz kirib turibdi. Ayrim joylarda millionlar o'yini allaqachon “yuzlar o'yini” maqomida.
Stadionga muxlis kirmasa lotoreyaga “Damas” qo'yish kerakmi? Ozgina farosati bor qiziqchiga bu g'oya - tayyor masalliq, bilsangiz. Avtomashina yutmoqchi bo'lgan kishiga futbolda balo bormi? O'zi shunaqa tinmay turli lotolar o'ynab turadigan insonlar bo'ladi. Ularni soni ham juda ko'p emas. Bilet olib maydonga kiradi, so'ng tanaffusda loto o'ynalgach, “ashaddiy muxlis” uyiga ravona bo'ladi.  
O'yna, yut, yutqaz! Agar chempion bo'lib, yurtda zo'r sanalsang kuchingni OChLda ko'rsat! Nomlari bir-biriga o'xshaydigan  arab klublari darvozasiga gollar yog'dir. Stadioningga muxlislar yog'ilib kelmasa, men kafil!    Mahallamizni kengroq joyida futbol o'ynayotgan bolajonlarni kuzatdim. Ular besh nafardan iborat beshta jamoa tuzishib, guruhiga nom ham qo'yib olar ekan. Biri “Real” yana biri “Barselona”, “Chelsi”, “Atletiko” va hokazo... Kichkintoylarni “Mayli, bu safar “Chelsi” bo'ldik, keyingi safar biz “Real” bo'lamiz” degani ortiqcha. Futbolkalari orqasida ham ajnabiy o'yinchilarning nomi. Qarab turib, ho'rliging keladi. Umuman olganda bizda nomini havas qiladigan klub, elkasiga ismini yozdiradigan futbolchining o'zi yo'q.
Nima ham derdik. Jurnalistlar jon kuydirib tanqidiy maqolalar yozaveradi, yozuvchilarimiz kinoya, qiziqchilarimiz askiya qiladi. Yigirma yillik amaliyot. Ming voylang, futbolimiz cho'qqisida turganlarga nolangiz etib bormaydi. Suvni singadigan joyga sepish kerak. Bolajonlarimiz faqat chet el futboliga ko'ngil qo'yib o'sayotgani esa juda alamli hol.   
Gapni ichakdek  cho'zgandan ko'ra, indalloga o'tgan ma'qul.  Qalam ahliga murojaat: Futbolimizni tanqid qilish kerakmi yoki yo'q?
Elmurod Ermatov, Andijon
— deya xabar beradi uff.uz nashri.