Malayziyada boshlanadigan o'yinni “Sport” telekanali orqali to'g'ridan-to'g'ri efir orqali tomosha qilishingiz mumkin.
23 mart kuni futbol bo'yicha Jahon chempionati-2018 turniri “A” guruhi 6-saralash turi doirasida O'zbekiston terma jamoasi Malayziyada Suriya termasiga qarshi maydonga tushadi.
 
Ushbu o'yinni “Sport” telekanali orqali to'g'ridan-to'g'ri efir orqali tomosha qilishingiz mumkin. Kanal ma'muriyatining xabar berishicha, o'yinni sharhlovchi Murod Rizaev sharhlab boradi. Murod Rizaev bir necha yillardan buyon yirik chempionatlar doirasidagi o'yinlarni sharhlab keladi.
 
Ma'lumot uchun, Suriya - O'zbekiston o'yinini BAAlik hakamlar guruhi boshqarib boradi. Bosh hakam Abdulla Muhammad Hasan bo'lsa, unga qanotlarda Muhammad al-Hammadiy va Hasan al-Mahriy yordam beradi. To'rtinchi hakam – Ahmad Hamis an-Naqbiy.
 
O'zbekiston va Suriya termasi o'rtasida avval ikki bor uchrashuv o'tkazilgan. 1996 yilgi Osiyo Kubogi doirasida Suriya termasi o'zbekistonlik futbolchilar ustidan 2:1 hisobida g'alaba qozongan edi. 2018 yilgi Jahon chempionati saralash bosqichida o'zbekistonlik futbolchilarning qo'li baland kelgan edi.
 
Ertangi uchrashuvda O'zbekiston terma jamoasiga ulkan zafar va g'alaba tilaymiz! O'yinni esa birgalikda kuzatib boramiz. Durdona Rasulova
— deya xabar beradi uff.uz nashri.