O'zbekiston milliy terma jamoasi uchun 2018 yili Rossiya Federatsiyasi maydonlarida o'tkaziladigan jahon chempionati uchun saralash o'yinlarining hal qiluvchi o'yinlari boshlandi. Ayni paytda terma jamoamiz beshta o'yindan so'ng 9 ochko jamg'argan holda uchinchi o'rinni egallab turibdi. Guruhimizda bizdan mos ravishda ikki va bir ochko ko'p jamg'argan Eron hamda Janubiy Koreya terma jamoalari etakchilik qilishyapti.
Terma jamoamiz ertaga Malayziyadagi Malakka shahridagi 40 ming muxlisga mo'ljallangan Hang Jebat Stadium maydonida nominal mezbon – Suriya terma jamoasiga qarshi maydonga chiqadi. 28 mart kuni esa yigitlarimiz Toshkentda Qatar terma jamoasiga qarshi to'p surishadi.
Bu uchrashuvlarning qanchalik muhim ahamiyat kasb etishini yaxshi tushungan futbolchilarimiz o'yinlarga puxta hozirlik ko'rishayapti. “Metallurg” futbol klubi a'zolari, muxlislarimiz, butun Bekobod ahli terma jamoamizga bo'lg'usi uchrashuvlarda omad va zafar yor bo'lishini tilaydi. Yurtimizda yangilanish, yasharish fasli – Navro'z ayyomlari keng nishonlanayotgan, xalqimiz ko'tarinki kayfiyatda yurgan bir paytda terma ajmoamiz a'zolari bir yoqadan bosh chiqarib, bir musht bo'lib raqiblarini dog'da qoldirishiga, qimmatli ochkolarni jamg'arib, xalqimizning yanada xursandchiligiga sabab bo'lishida deb umid qilamiz!
— deya xabar beradi uff.uz nashri.