"Chempionat.kom" nashri Rossiya chempionatida to'p surgan O'rta Osiyo futbolchilari reytingini tuzib chiqdi. E'tiborli tomoni, ushbu ro'yxatdan 4 nafar O'zbekiston futbolchilari o'rin olishgan.
10. Andrey Fedorov, O'zbekiston
"Alaniya", 1998-99. 42 o'yin, 1 ta gol
"Rubin", 2000-2008, 127 o'yin, 15 gol
Andrey Fedorov - Qurbon Berdiev tomonidan tayyorlangan "mashina"ning eng muhim qismlaridan biri bo'lgan edi. 2008 yilda Rossiya chempionatida g'alabaga erishgan jamoa tarkibida Fedorov aqlli o'yini va harakatchanligi bilan yodda qolgan. U jamoadoshlarining xatolarini to'g'rilay olish xususiyatiga ega edi va "Rubin" bilan Birinchi ligadan to chempionlikka qadar yo'lni bosib o'tdi.
Fedorov o'z vaqtida TsSKAda ham o'ynashi mumkin edi. Ammo Osiyo Chempionlar Kubogida hakamni tepgani uchun bir yilga diskvalifikatsiya qilingani pand berdi. Shunga qaramay Vladikavvaz, Kaliningrad va Qozondagi muxlislar Andreyni o'ziga ishongan va kuchli himoyachi sifatida eslab qolganlar.
9. Vitaliy Denisov, O'zbekiston
TsSKA, 2003-2006, 3 ta o'yin
"Lokomotiv", 2013 yildan buyon. 119 o'yin, 1 ta gol
Tezlik, ishtiyoq va qat'iyat - Denisovni ta'riflash uchun "Lokomotiv"ning har bir muxlisi tomonidan ishlatiladigan so'zlar. Vitaliyga nisbatan hech qachon e'tiroz bo'lmagan, u har bir o'yinda chap qanotda shu qadar shiddat bilan ishlaydiki, stadion agronomi uchun toptalgan maysani qayta tiklash oson ish emas.
Denisov Rossiyadagi faoliyatini TsSKAda boshlagan edi, ammo jarohat tufayli asosiy tarkibga kira olmadi. "Dnepr"da olti mavsum o'ynagach yana Rossiya chempionatiga qaytdi. Ulg'aygan va shakllangan futbolchi ayni vaqtda Liganing eng yaxshi qanot himoyachisi nomiga da'vogar.
8. Sergey Timofeev, Qozog'iston
«Dinamo», 1992-94, 43 o'yin, 3 gol
«Alaniya», 1995-97, 67 o'yin, 3 gol
«Lokomotiv NN», 1998, 32 o'yin, 6 gol
O'tgan asrning 90-yillarida Sergey Timofeev raqiblarini dahshatga solar edi. U qo'pollikka yaqinroq o'yin namoyish qilar, ammo o'z ishini har qanaqasiga bo'lsin bajarardi. U to'g'ri yoki noto'g'ri yo'llar bilan bo'lsin baribir o'z darvozasini himoya qila olgan.
"Shunchaki ko'pchilik o'n marta tepganda men bir marta tepganim etarli bo'lardi. Men har doim kurashuvchan futbolni tanlaganman, ba'zan qo'pollik bilan bo'lsada", - deydi Sergeyning o'zi. Ko'p jihatdan aynan u tufayli "Alaniya" 1995 yilda chempionlikni qo'lga kiritgan edi. Timofeevning o'zi esa Rossiya futuboli tarixida eng qo'pol o'yinchilardan biri sifatida qoldi.
7. Muxsin Muxamadiev, Tojikiston
«Lokomotiv», 1992-1993, 41 o'yin, 12 gol
«Spartak», 1994-1995, 30 o'yin, 13 gol
«Lokomotiv NN», 1996-1997, 56 o'yin, 16 gol
«Torpedo», 1998, 14 o'yin, 2 gol
«Shinnik», 1999, 11 o'yin, 1 gol
Muhsin Muhammadiev - o'zgacha futbolchi. U 1992 yilda Tojikiston terma jamoasi safida bitta o'yinda maydonga tushdi va ikkita gol urdi. Ammo oradan uch yil o'tib endi Rossiya terma jamoasida o'ynay boshladi. Va yana gol urdi.
Shunga qaramasdan "Chempionat.kom" nashri Muhammadievni baribir legionerlar qatoriga qo'shishga qaror qildi. Chunki u Dushanbeda tug'ilgan va aynan shu erda faoliyatini boshlagan edi. Rossiyada esa ko'plab klublarni almashtirgani bilan yodda qoldi. Shunga qaramasdan Muhammadiev hamma joyda o'ziga yarasha o'yin namoyish qilgan va qo'lidan kelgan barcha ishni amalga oshirgan.
6. Igor Cherevchenko, Tojikiston
«Lokomotiv», 1996-2001, 170 o'yin, 9 gol
«Torpedo», 2002, 12 o'yin
«Alaniya», 2002, 5 o'yin
Cherevchenko Dushanbeda tug'ilib, voyaga etgan va Tojikiston terma jamoasi safida 8 ta o'yinda maydonga tushgan. Shu bois ham u legioner sifatida ko'rsatilganidan aslo hayron qolmaslik lozim.
Himoyachi Tojikistonda taniqli futbolchi Genaddiy Cherevchenko oilasida dunyoga kelgan. O'z vaqtida "Pomir"ni boshqargan Yuriy Syomin 1996 yilda "Lokomotiv" boshqaruviga o'tgach Igorni ham jamoaga taklif qildi.
Cherevchenko "Lokomotiv" bilan uchta kumush medalni qo'lga kiritib, 4 bora mamlakat Kubogida g'alaba qozongan. Shu bilan birga ikki marta Rossiya chempionatining 33 ta eng yaxshi futbolchilaridan biri bo'lgan. 2002 yili Chempionlar ligasida "Real" darvozasiga kiritgan golini esa yoddan chiqarib bo'lmaydi.
5. Odil Ahmedov, O'zbekiston
«Anji», 2011-2014, 109 o'yin, 6 gol
«Krasnodar», 2014-2017, 101 o'yin, 7 gol
Futbol olamida Odil Ahmedovni yoqtirmaydigan birorta muxlis topilmasa kerak. Axir qanday qilib uning o'yinini yoqtirmay bo'ladi?
Odil maydonga bor kuchini tashlab chiqadigan haqiqiy professional. Maydondan tashqarida esa ochiq ko'ngilli yaxshi insondir. Uni tungi klubda musiqa sadolari ostida shampan vinosi ichib o'tirgan holatda ko'rmaysiz.
Ahmedov "Anji"ning yulduzli tarkibida o'z o'rniga ega bo'ldi va maydon markazini ushlab turishning uddasidan chiqdi. Eto'O va uning sheriklari hujumda ko'ngilxushlik qilib yurgan vaqtda Odil jamoa o'yinida barqarorlikni ushlab turardi. Shu bilan birga "Krasnodar"ga ham oson kirishib ketdi va jamoa rivojiga ulkan hissa qo'shdi.
4. Rashid Rahimov, Tojikiston
«Spartak», 1992, 1994-1995, 26 o'yin
«Lokomotiv», 1993-1994, 14 o'yin
Rashid Rahimov Rossiya chempionatida bor yo'g'i 40 ta o'yinda maydonga tushdi, ammo "Spartak" tarkibida ikki marta oltin medallarni qo'lga kiritdi va 1992 yilda sobiq ittifoq Kubogida ham g'olib chiqdi. Shu bois ham Rahimov Rossiya futbolida o'ziga hos o'ringa ega.
U "Pomir"da o'tkazgan 9 yillik faoliyati davomida Saddi Iskandariy nomiga ega bo'ldi. "Aleksandr Makedonskiy to'sig'i", degan ma'noni beradigan nom bejizga berilmagan. Rahimov qo'polroq o'yinchi edi va tez-tez sariq kartochka olib turardi. Ammo shu bilan birga aqlli va tarbiyali inson bo'lgan. U ettita tilni biladi! Aynan shu bois ham murabbiylik faoliyatida yutuqlarga erisha oldi.
3. Dmitriy Xomuxa, Turkmaniston
«Zenit», 1995-1996, 61 o'yin, 4 gol
TsSKA, 1997-2000, 116 o'yin, 27 gol
«Shinnik», 2001-2003, 69 o'yin, 16 gol
«Terek», 2004-2005, 36 o'yin, 4 gol
Dmitriy Xomuxa bolalikdagi murabbiyi Tojmurod Agamurodov iltimosiga binoan Turkmaniston terma jamoasida to'p surgan, ammo asli kelib chiqishi ukrainalik hisoblanadi. Turkmanistonda tug'ilgan va aynan shu erda faoliyatini boshlagan. Shundan so'ng esa Lvov, Grozniy, Piter va Yaroslavlda o'ynadi. Ammo ko'pchilik muxlislar Xomuxani TsSKAdagi o'yini bilan eslab qolgan.
Dmitriy TsSKAda ham, "Zenit"da ham yaxshi intizom va standart vaziyatlardan foydalana olishi bilan nom chiqardi. Shunga qaramasdan u "Terek" safida 2004 yilda qo'lga kiritgan Rossiya Kubogi yagona sovrin bo'lib qoldi. Murabbiylik faoliyati esa ancha omadli boshlandi. U Rossiya o'smirlar terma jamoasi bilan Evropa chempionatida g'olib chiqqan.
2. Vladimir Nidergaus, Qozog'iston
 «Rotor», 1992-1997, 1999, 168 o'yin, 68 gol
To'qsoninchi yillarda Esipov-Veretennikov-Nidergaus uchligi Rossiya futboli ramziga aylanib ketgan edi. Bu futbolchilar "Rotor" tarkibida ajoyib o'yini bilan tanilgandi. Qiziq tomoni, Vladimir "Spartak"ka ham o'tishi mumkin edi. ammo moskvadagilar unga kvartira bera olishmadi va asosiy tarkibdan joy ham kafolatlashmadi. Oqibatda Nidergaus Volgogradga yo'l oldi va muxlislarning suyukli futbolchisiga aylandi.
"Old Trafford"da "Manchester Yunayted" darvozasiga kiritgan golidan so'ng esa Rossiya futbolida asosiy o'yinchilardan biri bo'lib qoldi.
1. Mirjalol Qosimov, O'zbekiston
«Spartak» Vladikavkaz, 1992, 25 o'yin, 3 gol
«Alaniya», 1994-1996, 1999, 2003-2004, 104 o'yin, 30 gol
«Krilya Sovetov», 2000-2001, 45 o'yin, 6 gol
Tan oling, yomon futbolchiga "O'zbek Maradonasi" deb nom berilmagan bo'lardi. Garchi oradan 20 yildan ortiq vaqt o'tgan bo'lsada Vladikavkazda o'sha oltin jamoani juda yaxshi eslashadi. Mirjalol Qosimov esa bu jamoa safida maydonni bemisl darajada ko'ra olishi, paslari va jarima zarbalari bilan ajralib turgan.
"Liverpul"ga jarimadan kiritilgan golni ko'rgan har qanday muxlis uni hech qachon unutmasligi turgan gap. Rossiya chempioni, ikki karra kumush medal sohibi, yoshlar tarkibida Evropa va jahon chempioni bo'lgan futbolchi o'z yurtida ham ko'plab sovrinlarni qo'lga kiritgan. Yana savollar bormi?
Mirjalol Qosimov - Rossiya Premer-ligasi tarixida ilk golni kiritgan futbolchidir. U O'zbekiston futbolining haqiqiy namoyondasi va Rossiya chempionati tarixidagi eng yorqin legionerlardan biri bo'lib qoladi.
— deya xabar beradi uff.uz nashri.