XX asrning eng yaxshi futbol klubi - «Real Madrid»ga oid so'nggi xabarlar, jamoa tarixi va kelajagi, klub haqida qiziqarli fakt va statistikalarni batafsil yoritib borishga harakat qilamiz. Qani ketdik bo'lmasa... Ha, «Qirollik klubi»ni aprel oyida juda murakkab o'yinlar kutib turibdi. Neytral muxlis uchun «Real»ning ushbu oydagi o'yinlari «ishtahali» ko'rinmoqda, biroq bu palla Zinedin Zidan va uning shogirdlari uchun oson bo'lmaydi, ishonavering. Madridliklarni 15 kun ichida «Atletiko» bilan derbi, keyinchalik EChLda Myunxenning «Bavariya»si bilan ikki o'yin va undan so'ng «qaymoqranglilar»ni «Barselona»ga qarshi «el-klasiko» kutib turibdi. Shuningdek, ushbu vaqt oralig'ida La Ligada jon saqlashga urinayotgan «Sporting» Xixonga qarshi safar uchrashuvi ham bor. «Real» klubining aprel oyidagi uchrashuvlari: 2 aprel: «Real Madrid» – «Alaves» 5 aprel: «Leganes» – «Real Madrid» 8 aprel: «Real Madrid» – «Atletiko» 12 aprel: «Bavariya» – «Real Madrid» 16 aprel: «Sporting» – «Real Madrid» 18 aprel: «Real Madrid» – «Bavariya» 23-24 aprel: «Real Madrid» – «Barselona» 25-26 aprel: «Deportivo» – «Real Madrid» 29-30 aprel: «Real Madrid» – «Valensiya» Nisbatan osonroq uchrashuvlar bilan boshlanadigan aprel oyi Zidan shogirdlari uchun borgan sari murakkablashib boradi. Madridning «Atletiko»si «Bernabeu»da «Real»ga haqiqiy bosh og'riq bo'lishi tayin. Buning ustiga ularni to'rt kundan so'ng Karlo Anchelotti boshqarayotgan «Bavariya»ga qarshi safar uchrashuvi kutib turadi. Oradan yana shuncha vaqt o'tgach madridliklar engil tin olishlari mumkin, katta ehtimol bilan Zidan «Sporting»ga qarshi o'yinda zaxira kuchlarini maydonga tashlaydi. Yakshanba kunidagi o'yindan ikki kun o'tib «Real» o'zida «Bavariya»ni qabul qiladi, kim biladi deysiz, balki bu to'qnashuv madridliklar uchun aprelning eng muhim o'yiniga aylanar... Ammo, xulosa qilishga shoshilmaymiz, chunki «Barselona»ga qarshi «el-klasiko» printsipiallik bobida yuqoridagi barcha muhim o'yinlarni «ko'mib» yuborishi mumkin. Ha, to'g'ri ushbu bahsga ikki jamoa ham ancha kuch yo'qotgan holda etib keladi, «Barselona» bu o'yingacha Turinning «Yuventus» klubi bilan EChL doirasida kuch sinashadi. Biroq, bu faktlar bahona bo'la olmaydi, bu bahsda ushbu jamoalarning futbolchilari ikki hissa kuch bilan harakat qiladilar, kerak bo'lsa va bu o'yin La Liga chempionligi masalasini ham hal qilib qo'yishi mumkin. Nihoyat... deyishga shoshilmaymiz, «Real»ni oy oxirida ham oson o'yinlar kutib turgani yo'q. «Qirollik klubi» aprelning so'nggi haftasida printsipial raqiblari «Deportivo» va «Valensiya»ga qarshi o'ynaydi. Zidan ushbu murakkab davrdan jamoasini qanday olib chiqadi? Balki aynan shu davr frantsiyalik mutahassisning haqiqiy salohiyatini ko'rsatib berar. Agar «Real» ushbu «to'fon»ga chap bera olsa, may oyidagi sovrinlarga birinchi raqamli da'vogar bo'lishi mumkin. Nima bo'lgan taqdirda ham, «Real» ishqibozlari har doim o'z seviklilarini olqishlaydilan va unga oxirigacha ishonadilar. HALA MADRID!!!
— deya xabar beradi uff.uz nashri.