Oliy Liganing startiga to'g'ri kelgan mart oyi «Dinamo» jamoasi uchun omadli o'tdi, deyishga asoslar etarli. Klub rasmiy sayti muxlislar o'rtasida so'rovnoma o'tkazib, klubning mart oyidagi eng yaxshi futbolchisini aniqladi.
«Sizningcha, «Dinamo» jamoasining mart oyidagi eng yaxshi futbolchisi kim?» deya 10 kun davomida o'tkazilgan so'rovnoma yakuniga ko'ra, «Dinamo» jamoasi sardori Akmal Bozorov «oyning eng yaxshi futbolchisi» nomiga loyiq ko'rildi.
31 yoshli samarqandlik yarimhimoyachi jami 192 ta ovoz olib, umumiy muxlislarning 29 % foiz ovoziga ega bo'lgan. Chindanam, Akmal Bozorov mart oyida o'tkazilgan dastlabki to'rt turda maydonga tushib, «Metallurg» va «Sho'rtan» darvozasini ishg'ol etdi, «Paxtakor» bilan bahsda ham jamoaning ketma-ket uchinchi g'alabasiga katta hissa qo'shdi. Jarohatiga qaramay, «Navbahor» bilan bahsda zaxiradan maydonga tushdi.
Bu borada Bozorovga jamoa hujumchisi Sardor Sulaymonov «raqobatchilik» qildi. «Sho'rtan» va «Nasaf»ga qarshi nazorat bahsida gol muallifi bo'lgan 23 yoshli hujumchi 151 (22.8%) ovoz bilan ikkinchi o'rinda qayd etilgan.
Bu borada uchinchi o'rin Abdumalik Abdullaevga nasib etdi. Tezkor hujumchiga 126 ta ovoz berilgan bo'lib, bu jami ovozlarning 19% foizidir. Abdumalik «Metallurg»ga qarshi bahsda ikkinchi golga hammualiflik qilgan bo'lsa, «Sho'rtan»ga qarshi o'yinda zaxiradan tushib gol urishga erishdi.
Shuningdek, jamoa posboni Mixail Naumov 64 (9.7%), iqtidorli yarimhimoyachi Javohir Qahramonov 61 (9.2%), yosh markaziy himoyachi Bunyod Isroilov 34 (5.1%), qanot yarimhimoyachisi Orif Mamajonov 18 (2.7%) va himoyachi Shohruh Xolmatov 17 ta ovoz (2.6%) muxlislar tomonidan e'tirof etilgan.
Eslatib o'tamiz, mart oyida «Dinamo» to'rt o'yinda uchta g'alaba va bir mag'lubiyatga uchrab, turnir jadvalida 3-pog'onadan joy olgan. Jamoa navbatdagi uchrashuvni 7 aprel kuni Qo'qonda mahalliy jamoaga qarshi o'tkazadi. «Dinamo» klubi matbuot xizmati
— deya xabar beradi uff.uz nashri.