“Real Madrid” jamoasi yarim himoyachisi Isko “Barselona” klubiga o'tmaydi. Bu haqda futbolchi “Tvitter”dagi sahifasida ma'lum qildi. “Men “Barselona”ga o'tmayapman. Yuklagan suratim orqali shunchaki chips iste'mol qilayotganimni ko'rsatdim, xolos”, – deb yozdi Isko. Avvalroq ispaniyalik futbolchi “Barselona” chipslari oldida tushgan suratini ijtimoiy tarmoqlarga yuklagandi. Bu esa har ikki jamoa muxlislari orasida tushunmovchiliklar keltirib chiqardi. Bundan avval esa Ispaniya matbuoti Iskoning “Real” bilan shartnomasi 2018 yili yakuniga etishini va “Barselona” uni erkin agent sifatida o'z safiga qo'shib olishini bir necha bor ta'kidlagandi. Joriy mavsumda tajribali futbolchi Ispaniya chempionatining 24 o'yinida maydonga tushib, 7 ta gol va 4 ta golli uzatmaga mualliflik qildi. 
— deya xabar beradi uff.uz nashri.