1news.uz —Shu kunlarda og'ir atletika bo'yicha O'zbekiston o'smirlar terma jamoasi Tailand poytaxti Bangkok shahrida bo'lib o'tayotgan jahon chempionatida ishtirok etyapti. III o'smirlar Olimpiya o'yinlariga yo'llanma beruvchi mazkur musobaqaga jamoamiz ilk bor to'liq tarkib bilan jo'nab ketgan.  Og'ir atletikada litsenziyalar muayyan sportchilarga emas, balki jamoalarga beriladi. Shu bois, imkon darajasidagi eng ko'p yo'llanmalarni ko'zlagan har bir jamoa shunday yo'l tutishi ma'lum. Demak, xulosa qilish mumkinki, federatsiyamiz mutasaddilari 2+2 shaklidagi maksimal litsenziyaga ega bo'lish maqsadida ham qizlar, ham o'g'il bolalardan 8 nafardan – jami 16 atlet bilan Tailandga yo'l olgan. Delegatsiya tarkibidan, shuningdek, Osiyo og'ir atletika federatsiyasi vitse-prezidenti sifatida Shahrillo Mahmudov, chempionat hakamlari safida qayd etilgan Zuhra Abdullaeva va tabiiyki, murabbiylar (Boris Savchenko, Bahrom Mediboev, Jo'rabek Zoirov va Mahmud Tog'aev) o'rin olishgan. Umuman olganda, yosh sportchilarimiz jahonning kuchli jamoalari vakillari orasida munosib qatnashayotganliklarini ta'kidlab o'tish joiz. To'g'ri, biz og'ir atletikachilarimizning xalqaro, nafaqat qit'a darajasidagi, balki dunyo miqyosidagi eng yirik musobaqalarda medallarga da'vogarlik qilishlariga ko'nikib qoldik. Shu ma'noda, yakuniga etib borayotgan jahon chempionatida jamoamiz hozircha atigi 2 ta medal qo'lga kiritgani, kimlargadir, nisbatan pastroq natija bo'lib tuyulishi mumkin. Aslida, bunday emas. O'zbekiston o'smirlar terma jamoasining Bangkokdagi ishtirokini bemalol yaxshi baholasa bo'ladi. Nega? Birinchidan, jamoamiz 17 yoshgacha bo'lgan sportchilar o'rtasidagi jahon chempionatiga, takror bo'lsa ham aytish joiz, ilk bor to'liq tarkib bilan yo'l olgan. Avvalambor, murabbiylarimizning maqsadi medallar ortidan quvib, taktik kurashni boy bergan holda, umumjamoa hisobida pastga  sho'ng'ishdan saqlanish. Shundagina, yo'llanmalarni qo'lga kiritish uchun imkoniyatlarimiz oshadi. Ma'lumot uchun aytib o'tamiz, qizlar o'rtasida ham, o'g'il bolalar o'rtasida ham umumjamoa hisobida 1-7-o'rinlarni egallagan davlatlarga Buenos-Ayresga 2 tadan litsenziya taqdim etiladi. Hech bo'lmaganda 8-16-o'rinlarni band etib 1+1 ko'rinishidagi yo'llanmalarni naqd qilish mumkin. Ikkinchidan, jamoamiz safida faqat 6 kishi 17 yoshda. Ularning 5 nafari o'g'il bolalar. 7 nafar sportchimiz 16 yoshga qadam tashlagan bo'lsa, 3 sportchimiz hali bor-yo'g'i 15 yoshda. Ochig'i, bu galgi jahon chempionatida federatsiya rahbariyati tomonidan murabbiylar va atletlar oldiga medal qo'lga kiritish vazifasi umuman qo'yilmagandi. Birinchi maqsad, boya aytganimizdek, iloji boricha mavjud imkoniyatlardan unumli foydalanib, urinishlarni yo'qqa chiqarmasdan, yuqoriroq o'rinni band etish. Vaziyat taqozo etsagina, sovrinli o'rinlar uchun kurashish. Shunga qaramasdan, jamoa a'zolari orasida hozirning o'zida medalga sazovor bo'lganlar bor. Qarangki, hech kim kutmagan bir vaqtda, 15 yoshli sportchi qizimiz Kumushxon Fayzullaeva og'ir atletikamiz tarixida yana bir yangi sahifa ochishga muvaffaq bo'ldi. U o'tgan yil 20 yoshgacha bo'lgan qizlar o'rtasida ilk bor jahon chempinati medaliga sazovor bo'lgan Muattar Nabievaning zafarli yurishini davom ettirdi. 69 kg vazn toifasida qatnashgan Kumushxon berilgan barcha imkoniyatlardan samarali foydalangani, ayniqsa, diqqatga sazovor. Tan olish kerak, u dast ko'tarishdagi 76, 79, 82 kg natijalaridan so'ng 6-o'rin bilan kifoyalanishga majbur bo'ldi, lekin bu holat irodali sportchi qizimizning siltab ko'tarish va ikkikurashda shohsupaga ko'tarilishiga xalaqit bera olmadi. Navoiy og'ir atletik amaktabida tarbiyalangan Kumushxon Fayzullaeva siltab ko'tarishda birin-ketin raqiblarini ortda qoldirib keta boshladi va oltin medal uchun ham oxirigacha kurashdi. Avvaliga 100, keyin 104 va 106 kg og'irlikdagi toshni bo'ysindirgan hamyurtimiz faqatgina Turkiya vakilasi Nuray Leventdan atigi 1 kg kam ko'tardi. Siltab ko'tarishda o'zbek qizi Ukraina, Ruminiya, Balarus qizlaridan 4-5 kg o'zib ketdi. Shu tariqa ikkinchi mashq bo'yicha sportchimizga kumush medal topshirildi. Ikkikurashda Leventdan tashqari Mariya Gangur (Ukraina) degan raqib dugonasiga atigi 1 kg yon bergan Kumushxon Fayzullaeva Tailandan bitta kumush va bitta bronza medal bilan qaytadigan bo'ldi. Yana bir narsani ta'kidlab o'tish kerak, Kumshxonning barcha asosiy raqiblari 17 yoshli atletlar edi. Ha, aytgancha, ushbu musobaqada 8 sportchi qizimizdan 5 nafari kuchli hisoblangan “A” guruhida qayd etilishi, qizlar jamoamiz ham asta-sekin dunyo etakchilari safiga dadil kirib borayotganidan darak beradi. Hozirgacha supachaga chiqib bo'lgan boshqa qizlarimiz orasidan Qashqadaryo viloyatida tug'ilib o'sgan Tursunoy Jabborovaning natijalarini alohida tilga olib o'tish joiz. Bu qizimiz 69 kg vazn toifasi kuchlilar guruhida qatnashib, shohsupadan bir qadam berida to'xtadi. Ahamiyatlisi, u ham hali 15 yoshda. Tursunoy Bangkokda o'zidan 2 yosh katta raqiblari bilan munosib raqobatga kirisha oldi. Albatta, Ekvador, Kolumbiya va Qozog'iston vakillaridan keyin 4-o'rinni egallash hamyurtimiz uchun biroz achinarli, ammo ko'nglimizni xotirjam qiladigan jihat shuki, qizlarimiz jahon chempionatidek, nufuzli musobaqada ilk bor ishtirok etganliklariga qaramasdan, o'zlarini yo'qotib qo'yishmadi. Aynan shu holat, bizga kelgusidagi sinovlar chog'i, va albatta, agar niyatlarimiz ijobat bo'lib, Olimpiada yo'llanmalarini qo'lga kirita olsak, Argentinada qo'l kelishi tayin. Aslida, federatsiya mutasaddilari yosh qizlarimizning xalqaro maydonda tajriba orttirishlarini ko'zlab, to'g'ri qaror qabul qilishgan. Darvoqe, xivalik Shahloxon Abdullaeva, garchi 58 kg vazn toifasi “V” guruhida qatnashgan bo'lsa-da, kuchli guruhdagi bir qator raqiblaridan o'zib keta oldi. Jahon chempionatida 10-o'rin yomon natija emas. Endi o'g'il bolalar jamoamiz ishtirokiga ham qisqacha to'xtalish vaqti keldi. Ushbu yosh toifasida bizda jahon chempionati g'olibi ham, sovrindorlari ham bor – Adham Ergashev, Ro'zimurod Aslanov va Mashhurbek Yo'ldoshev. Afsuski, yigitlarimiz, hozircha o'zlariga bildirilgan ishonchni to'liq oqlay olishmayapti. Bugungacha 8 sportchimizdan 6 nafari musobaqani yakunlab bo'lishdi. Eng yaxshi natija Samarqand viloyatidan terma jamoaga jalb etilgan Azimjon Hojievga tegishli. U kuchli guruhda qatnashib umumiy hisobda 6-o'rinni egalladi. Xiva og'ir atletika maktabi vakili Asadbek Narimonovning 10-o'rinni band etgani ham birmuncha yaxshi ko'rsatkich, desak bo'ladi. Xabarning tafsilotlari bilan 1news.uz saytida ushbu havola orqali tanishishingiz mumkin.
— deya xabar beradi uff.uz nashri.