Myuxenda o'ynash va u erda «Bavariya» bilan kuch sinashish – futbolda mavjud eng qiyin imtihonlardan biri hisoblanadi. «Bavariya» qanday tarkibda va har qanday davrda dunyo futbolining grandlari qatorida turgan, o'sha Frants Bekkenbauer, Paul Braytner va Gerd Myullerlar to'p surgan davrlarni eslang. Bu jamoa g'alaba qozonishga shunday ko'nikib qolganki, natijada ularning muxlislari jamoadan faqat g'alaba kutishga o'rganib qolganlar va har vaqt bunga ishonadilar. Agar «Bavariya» yaxshi harakat qilsa albatta g'alaba qozonadi, nobodo yomon harakatlangan taqdirda ham kamdan-kam mag'lub bo'ladi. «Bavariya» har gal EChL favoritlari qatorida tilga olinadi... Biroq «Real» Myunxendagi stadion bosimiga dosh bera oldi va ikkinchi bo'limda raqibini esda qolarli darajada mag'lub etdi. Uch yil avval ham «Real» «Alyants Arena»da myuxenliklarni 4:0 hisobida mag'lub etgandi. O'sha o'yindagi g'alaba mukammal bo'lgan edi, Qirollik klubi o'z vaziyatlaridan jarroh kabi aniq foydalangan va natijani qo'lga kiritgan edi. O'sha bahsda «qaymoqranglilar» raqib himoyasini charchatib, qator vaziyatlar yaratdi va «Bavariya»ni har jihatdan mag'lub etdi deb ayta olmaymiz. Chorshanba kunidagi o'yinda esa «Madrid» kamtarona hisobda (2-1) g'alabaga erishdi, biroq shu bilan birga ishonch va yuqori darajani ham ko'rsatib bera oldi. Aytish mumkinki, madridliklar faqatgina yutib qolmay, raqibni o'z uyida har tomonlama engdilar, «Real» ikkinchi bo'limda «Bavariya»ni bamisoli «chaynab» tashladi. Ammo «Bavariya» eng yomon o'tkazgan o'yinlarida ham raqibga muammo tug'dira oladi, u shuning uchun ham – «Bavariya»dir. Birinchi bo'limda mezbonlar hujumda ulkan kuchga ega ekanliklarini isbotladilar. Ularda Arer Robben juda yaxshi harakat qildi va Marseloga ko'plab muammolar tug'dirdi. Uchrashuvning 25-daqiqasida burchakdan uzatib berilgan to'pni Arturo Vidal darvozaga joylab qo'ydi, futbolchi shunchaki fantastik tarzda kurashga qo'shildi va o'z vaziyatini ko'kka sovurmadi. O'sha vaziyatda Nacho diqqatni yo'qotgandi, biroq bu xato uning butun o'yindagi harakatlarini yo'qqa chiqarolmaydi, himoyachi o'sha kuni juda yaxshi o'ynadi. Ammo, «Bavariya» ustunlik qilgan birinchi bo'limda ham madridliklarda ijobiy vaziyatlar bo'ldi, masalan: Dani Karvaxal Frank Riberiga o'yin bermadi, Serxio Ramos o'z jarima maydoni ichida butunlay hukmronlik qildi, Karim Benzema esa o'zining «total» o'yini bilan yodda qoldi. Madridning qolgan futbolchilari birinchi bo'limda o'rtacha harakat qildilar. Faqatgina Garet Beylning o'yinigina nolga yaqin bo'ldi, futbolchi David Alabaga deyarli qarshilik ko'rsata olmadi. «Bavariya» hisobni 2:0 ga keltirishiga bir qadam qolgandi, biroq xato tufayli belgilangan penaltini Arturo Vidal aniq amalga oshira olmadi. Ochig'ini aytganda, «Bavariya» ikkinchi golni urishga loyiq emas edi. Birinchi bo'limda «Real» o'yinni bir maromda ushlab tura oldi, ikkinchi bo'limda esa «Madrid simfoniyasi» bor ovozda jarangladi. Hech kim chetda qolmadi va jamoa bir butun bo'lib harakat qildi. Xavi Martinesning chetlatilishi «Bavariya»ning o'yin uslubini butunlay o'zgartirib yubordi. Karlo Anchelotti esa juda g'alati qaror qabul qildi va maydondan Xabi Alonsoni olib tashladi, buning bilan u maydon markazini raqibga topshirib qo'ya qoldi. «Real» Martinesning chetlatilishidan avvalroq o'yin tizginini qo'lga olgan edi. Biroq raqib o'n kishi bo'lib qolgandan so'ng, Zinedin Zidan shogirdlari o'zlari va muxlislarni xursand qilish uchun o'ynadilar. Dani Karvaxal, Kazemiro, Karim Benzema, Krishtiano Ronaldu va yosh Marko Asensio o'yin qahramonlariga aylandilar. Ushbu bahsda Dani Karvaxal juda yaxshi harakat qildi. U ham himoyada, ham hujumda mukammal o'ynadi. Tayanch zonasida betakror o'yin namoyish qilgan Kazemironi ham alohida ta'kidlash lozim. Va albatta, Krishtiano Ronaldu eng muhim uchrashuvda o'zini ko'rsatdi va ikkita gol kiritishga erishdi. Marko Asensio Myunxendagi o'yinning kichik sensatsiyasiga aylandi desak adashmagan bo'lamiz. Yosh iqtidor egasi maydonning har xil qismida foydali va ayyorona harakatlari bilan ajralib turdi. «Real Madrid» Myunxen imtihonidan a'lo bahoga o'tdi va o'zi uchun yarim final eshiklarini qiya ochib qo'ydi. Bugungi o'yinda ham o'tgan bahsda bo'lgani kabi jamoadan shiddatli o'yin va qoniqarli natijani kutib qolamiz. Bugungi o'yinni o'tkazib yubormang! HALA MADRID!!!
— deya xabar beradi uff.uz nashri.