Xolislik futbol jurnalistning fazilatimi? Majburiyatimi? Ikkalasi hammi? Na unisi va na bunisi, desam-chi?Futbol jurnalistidan xolislik talab qilishni yaxshi ko'rishadi bizda. Har doim muhokamadan tushmaydigan mavzulardan bu. Ayniqsa sharhlovchilarga nisbatan shu talab ko'p yangraydi. Bosma nashrlarda faoliyatini olib boradiganlar ishida ham xolislik — eng asosiysi, doim yodda tutish kerak bo'lgan tushuncha, qadriyat va majburiyat ekani ko'p aytiladi. «Sharhlovchi tarafkashlik qilmasin»,  «Jurnalist hech kimga muxlis bo'lmasin», «Doim o'rtani ushlasin», «Odil bo'lsin!»… Xo'p, yaxshi. Keyinchi? Shunaqa qilsa nima bo'ladi? Sharh qiziqroq, futbol ko'rishliroq, maqola o'qishliroq bo'ladimi? Jurnalistning muxlisi, nashrning adadi oshadimi? Blogerning tashrifchisi ko'payadimi? Unchalikmas. Shulardan birortasiga ham sabab bo'lmasa kerak, deb o'ylayman hatto. Ha! Futbol sharhiga bo'lgan munosabatning o'zi turlicha. Kim uchundir sharh futbolni ko'rishga halal bermasa bo'ldi. Ayrimlar uchun sharh o'yin va uning ishtirokchilari haqida kerakli ma'lumotlarni bilib olsa etadi. Men uchun esa sharh futbol tomoshasining ajralmas qismi. Menga bu narsa shu darajada muhimki, hatto faqatgina sharh uchun ham o'yinni tomosha qilib berishim mumkin.Tabiiyki, sharhlovchilardan kutadiganlarim ham shunga yarasha. Sharh xolis bo'lsa bo'lgani, deb bilmayman. Men uchun u qiziq bo'lishi kerak. Unda original fikrlar yangrasa, ajoyib o'xshatishlar qilinsa, eng qiziqarli, e'tiborga molik, hayratlantiradigan faktlar berilsa, u jonli bo'lsa va u emotsiyalar bilan qorilgan bo'lsa, deyman. Futbolni ko'pchilik qatori, asosan ruscha sharhda ko'raman. Deyarli barcha sharhlovchilar qaysi jamoa muxlisi ekanini bilaman va menga ularning aynan o'sha jamoalar ishtirokidagi o'yinlarda ishlashi yoqadi. Nega? Ular o'z suyuklilari haqida befarq-u, betaraflardan ko'proq bilishadi. Doimiy ravishda jamoadagi yangiliklardan boxabar bo'lishadi. Buni kasb taqozosi, professional vazifa bo'lgani uchungina emas, o'zlari xohlab qilishadi. Tabbiyki, ularning sharhi faktlarga, yangiliklarga boyroq bo'ladi, tahlillar chuqurroq bo'ladi, vaziyat kengroq yoritiladi. Ularga bunday o'yinlarda sun'iy emotsiyalar ham kerak emas. Bunaqa vaqtda uning hayajoni-da, suyunishi-da, achinishi-da, afsusi-da tabiiy bo'ladi. Ular bor mehrini berib olqishlaydi, nimadir o'xshamasa, bor zaxrini ham sochib olaveradi. Tashbehlari vaziyatga mosroq bo'ladi, chiroyliroq chiqadi. Faqat suyukli jamoa emas, yoqtirgan chempionatlari sharhi haqida ham yuqoridagi fikrlarni bildirish mumkin. Vasiliy Utkinning eng yorqin sharhlari «Real»ning o'yinlarga, Georgiy Cherdantsovning eng ko'p iqtibos keltiriladigan, keyinchalik hammaning tiliga tushadigan neologizmlar qo'llanadigan sharhlari Italiya chempionati o'yinlariga to'g'ri kelishi shundan. Shu sababdan ham Denis Kazanskiyning MYu ishtirokidagi bahslardagi sharhlari o'zgacha chiqadi… ...
Davomi «TAFSILOT.UZ» saytida
— deya xabar beradi uff.uz nashri.