O'zbekiston - KXDR to'qnashuvi terma jamoa uchun muhim uchrashuvlardan biri sanaladi. Hal qiluvchi ahamiyatga ega bo'lgan o'yindan oldin biz bir nechta futbol jurnalistlari fikrlari bilan qiziqdik:
O'tkir UMAROV (InterFutbol gazetasi):
-Bugungi o'yinda terma jamoamiz yaqqol favorit. Shuni ishonch bilan ta'kidlash joizki, KXDR maydonidagi mag'lubiyat shunchaki tasodif edi, xolos. O'zbekiston terma jamoasi bugungi tarkibi bilan nafaqat Shimoliy, balki Janubiy Koreyani ham bemalol taslim eta oladi. O'zbek futboliga befarq bo'lmagan ishqibozlarning bugungi o'yinni yurakda xavotir bilan kutishayotganini to'g'ri tushunish mumkin. Yoddan chiqarmaylik, Filippin va Bahraynga qarshi kechadigan bahslar arafasida ham shunday holatga duch kelgandik. Natija esa barchaga ayon. Bu esa, JCh-2018 saralashining ushbu bosqichida termamizga jiddiy raqobat tug'diradigan jamoaning yo'qligiga ishora. Yigitlarimiz bugun «Paxtakor» stadionida o'tkaziladigan o'yinda to'liq ustunlikka erishib, yuqoridagi fikrning nechog'li to'g'ri ekanini isbotlashadi. Har holda, bugun O'zbekiston terma jamoasining ishonchli tarzda g'alaba qozonishiga 100 foiz ishonaman. Olg'a, yigitlar!!!
Taxminimcha, bugun terma jamoamizning tarkibi quyidagicha ko'rinish oladi: A. Lobanov, E. Krimets, A. Ismoilov, V. Denisov, I. To'xtaxo'jaev, A. Haydarov, O. Ahmedov, S. Rashidov, S. Jeparov, M. Bikmaev, I. Sergeev.
Akmal EShONXONOV (InterFutbol gazetasi):
- Bugungi o'yin terma jamoamiz uchun oson o'tadi deya aytolmayman. Zero, O'zbekiston shimoliy koreyaliklarni Avstraliyada bo'lib o'tgan Osiyo Chempionatida kichik hisoba enggan bo'lsada, JCh saralash bosqichining safar o'yinidi mag'lubiyatga uchragan. To'g'ri, Mirjalol Qosimov boshqargan terma bilan hozirgi vaqtdagi jamoaning eru-osmonchalik farqi bor. Asta-sekin kutilgan natijalarga erishilyapti. Lekin biz avvalgi o'yinlar (Yaman, Filippin, Bahrayn) natijasini eslamasdan maydonga faqat uch ochko olish uchun tushushimiz lozim. KXDR termasidagi futbolchilar asosan baland bo'yli yigitlar bo'lishgani tufayli, bugun Anzur Ismoilov va Egor Krimetsga biroz bosim sezilishi tabiiy. Pxenyandagi uchrashuvda KXDR termasining 42000 ishqibozi jamoalarini olqishlab, qo'llab-quvvatlashgani albatta, yodingizda. O'ylaymanki, bu holat o'zbek futboli muxlisining qo'lidan keladi. O'zbekiston futbol ahlining birlashish vaqti etib keldi. Bugun – asosiy e'tiborga molik uchrashuvni o'tkazadigan O'zbekiston milliy terma jamoasi, 2018 yil Rossiya maydonlarida o'tadigan turnirda ishtirok etishga haqlidir. Buni hech ham inkor eta olmaymiz. Demak, bugun birgalikda g'alaba sari dadil qadam tashlaymiz!!!
Asosiy tarkibdagi taxmin quyidagicha ko'rinish oladi: A. Lobanov, E. Krimets, A. Ismoilov, V. Denisov, I. To'xtaxo'jaev, A. Haydarov, O. Ahmedov, S. Rashidov, S. Jeparov, E. Shomurodov, I. Sergeev.
Bekzod NAZAROV ("Paxtakor" klubi matbuot kotibi):
- Qiyin o'yin bo'ladi. KXDR hamisha bor kuchini berib o'ynaydi. Standart vaziyatlar va qanotdan uyushtiriladigan hujumlarga katta e'tibor beradi. Texnik tomondan kamchiliklarni oxirigacha o'ynash orqali yopishga harakat qiladi. Biz esa texnik va futbolchilarning individual mahorati tarafdan kuchlimiz. Aynan shundan foydalanishga urinib ko'rishimiz lozim. Raqib bizni himoyada qarshi olishiga shubha yo'q. Agar himoyani tezroq yorib o'tsak, barchasi biz uchun yaxshi bo'ladi.

— deya xabar beradi uff.uz nashri.