Bugun Oliy ligamizning 8-tur o'yinlari davom ettiriladi. Tur doirasida Farg'onada “Neftchi” Toshkent viloyatining “Olmaliq” klubini qabul qiladi. O'tgan turda muvaffaqiyat nashidasini surgan “Neftchi” bu safar o'z muxlislari qarshisida navbatdagi g'alaba uchun o'ynashi tayin, “Olmaliq” esa  so'nggi turda uyda yo'qotilgan 2 ochkoni bugun Farg'onada to'ldirishga intiladi. Umuman olganda “Istiqlol” stadionida muxlislarni qiziqarli raqobat kutmoqda. Hisob bo'yicha bu o'yin “Neftchi” va  “Olmaliq” jamoalarining o'zaro 19-uchrashuvi sanaladi. Bugun kungacha jamoalar 18-marta bir-birlariga qarshi maydonda saf tortishgan. Ushbu o'yinlardan 10 tasida farg'onaliklar g'olib bo'lishgan. 3ta o'yin durang hisobida yakunlangan, “Olmaliq” hisobida 5ta g'alaba mavjud. “Neftchi” shu kungacha o'zaro o'yinlarda “Olmaliq” darvozasiga 35ta to'p kiritgan, Toshkent viloyati klubi esa “Neftchi” darvozasiga 20 ta gol urgan. “Olmaliq”  o'zaro o'yinlarda 18 ochko ishlab olgan bo'lsa, “Neftchi” 33 ochkoni qo'lga kiritgan. “Neftchi”ning oliy ligada “Olmaliq” ustidan erishgan eng yirik g'alabasi 4:0 ni tashkil qiladi. “Olmaliq”ning yirik g'alabasi esa 3:0. «Neftchi» (Farg'ona) – «Olmaliq» (Olmaliq) 29 aprel 2017. Farg'ona. “Istiqlol” stadioni. 17:00 Hakamlar: A. Asimov (Toshkent), A. Usmonov (Toshkent), T. Gaynulin (Toshkent), A. Lupashko (Toshkent)
Nazoratchi: S. Ermatov (Toshkent).
O'zPFL vakili: A. Frolov. Barcha futbol muxlislarini mazkur bahsga chorlab qolamiz! “Neftchi” matbuot xizmati
— deya xabar beradi uff.uz nashri.