Uch oy avval internet nashrlari orqali “Dinamo-plyus” PFK tasarrufidagi Bolalar va o'smirlar maxsus futbol sport maktabida bo'lib o'tayotgan voqealar xususida “O'raga sichqon tushdi...” sarlavhasi ostida maqola e'lon qilingan edi. Mazkur maqolada keltirilgan faktlar va futbol maktabida faoliyat yuritayotgan xodimlarning murojaatlaridan so'ng maktabdagi asl holat tegishli tashkilotlar tomonidan o'rganilmoqda. Ma'lumotlarga ko'ra, dastlabki o'rganish jarayonida salkam 36 million so'mlik qing'ir ishlar aniqlangan. Tekshiruv jarayonida aniqlangan mablag'ning 16 million so'mi “xizmat safari”dagi “o'yinlar” evaziga kelib chiqqan bo'lsa, futbol maktabi hisobchisining “olg'irligi” evaziga 20 million so'm o'zlashtirilgan. Afsuski, tegishli tashkilotlar ishonib yuborgan “revizor” tekshiruv jarayonida aniqlangan holatlarning ayrimlarini ko'rmay qolgan yoinki ko'rishni istamagan. Balki futbol maktabi direktori va hisobchisining “iltimosi”ga ko'ra “revizor” tekshiruvni “engillashtirgandir”. Buyog'i hozircha bizga noma'lum. Taftishchining keltirilgan ma'lumotlarga asosan o'z ishini shunchaki yuzaki amalga oshirganligini quyidagi holatlar bo'yicha ko'rish mumkin: 2016 yilda Navro'z umumxalq bayrami munosabati bilan “Dinamo-plyus” PFK tasarrufidagi Bolalar va o'smirlar maxsus futbol sport maktabi direktorining imzosi bilan murabbiy va ishchi xodimlarni moddiy rag'batlantirish to'g'risida qaror chiqarilgan. Buni qarangki, moddiy rag'batlantirish to'g'risidagi qarordan ko'pchilik xodimlar bexabar qolgan. Xususan, futbol maktabi shifokori Raxmon Mavlonov o'ziga chiqarilgan bir million so'mlik moddiy rag'batlantirishni taftishchi kelgandan so'ng xabar topmoqda. Endi bir o'ylab ko'ring, o'ttizdan oshiq xodimni boshqargan direktor va hisobchi har birining nomiga shuncha miqdorda bayram puli chiqargan bo'lsa va xodimlar bundan bexabar qolsa, necha million so'm mablag' “tuya” qilinganini hisoblash uchun matematik olim bo'lish shart emas. Xodimlarni moddiy rag'batlantirish to'g'risidagi holatni negadir “revizor” chuqur o'rganmadi? Yoki bu erda tekshiruvchining boshqa bir manfaati bormi? Xuddi shunday, moddiy rag'batlantirish to'g'risidagi qaror 2017 yilning 6 mart kuni direktorning ko'rsatmasiga asosan maktabda faoliyat yurituvchi 15 nafar xodimga chiqarilgan. Negadir, futbol maktabining qolgan xodimlari moddiy rag'batlantirishdan mosuvo qilingan? Xo'sh, nega? Qaysi asosga ko'ra? Tekshiruvlar jarayonida futbol maktabida murabbiy bo'lib ishlaydigan Anvar Mamasharipovnig plastik kartochkasiga 4 million so'm pul tashlab berilganligi aniqlangan. Anvar Mamasharipovning ta'kidlashicha, plastik kartochkasiga 4 million so'm pul tushganidan so'ng kartochkani futbol maktabi direktori Jahongir Eshonqulovga bergan.  Ko'rinib turibdiki, ushbu mablag' ham direktorning cho'ntagini izlab topgan. Biroq, taftishchi mazkur holatni to'liq o'rganmasdan, Anvar Mamasharipovning qandaydir tilxati bilan masalani silliqqina yopib yuborganligini tushunish qiyin. Bu pullar Anvar Mamasharipovga qaysi asosga ko'ra berilganligini tekshirish nega “revizor”ning “hayolidan ko'tarilib” qoldi? Mutasaddi tashkilot vakillari “revizor”ga ishonch bildirib noqoqniniy holatlarni aniqlash maqsadida nazorat-taftishchini yuborsayu, ular ishongan taftishchi o'zi bilgan kuyni chalsa, qanday qilib haqiqatni yuzaga chiqarish mumkin. Taftishchi tomonidan asl holatlar yashirilsa tekshirilgan idoraning iqtiosdiy qing'irliklariga uning o'zi ham sherik bo'lib qolmaydimi? Yana bir holat. Futbol maktabidagi avtobusni ta'mirlash uchun ham noma'lum firma hisob raqamiga pul ko'chirilgan. Qiziq jihati shundagi, avtobusni ta'mirlash uchun ajralitgan puldan negadir haydovchi bexabar qolgan. O'rganishlar jarayonida “revizor” xodimlarning umumiy oylik masalalarini o'rganmagan. Kimningdir hayoliga buni nega o'rganish kerak degan fikr kelishi mumkin. Ammo Raxmon Mavlonovning bankdan chiqarilgan oylik maoshi to'g'risidagi ma'lumot bilan hisobchining “rivizor”ga taqdim etgan “daxod”dagi raqamlar umuman boshqa-boshqa ekanligini hisobga olsak, taftishchi qolgan xodimlarning maoshlarini ham nazoratdan o'tkazish kerak, nazarimda? Afsuski, taftishchi bank ma'lumotidan ko'ra, hisobchining soxta ma'lumotini haqiqiy deb topishni lozim deb bilgan. Xo'sh, tashftishchi bankning ma'lumotidan ko'ra hisobchining ma'lumotini to'g'ri deb qabul qilishiga kim yoki nima majbur qildi ekan? Tekshiruv jarayonida taftishchining asl vazifasi nima? Xodimlarni ishdan olishmi yoki qonunbuzarliklarni aniqlashmi? Futbol maktabini tekshiruvdan o'tkazgan taftishchi tekshiruv jarayonida futbol maktabida farrosh bo'lib ishlaydigan Hanifa Otamurodova va Nargiza Raximovani bu erda noqoqnuniy ishlab kelayotganini aytib, ularni ishdan bo'shashi lozimligi haqida aytganini qanday tushunish mumkin. Agar ular noqonuniy ishlayotgan bo'lsa, o'sha qonun buzilishini aslida futbol maktabi direktori amalga oshirmaganmi? Qolaversa, Hanifa Otamurodovaning turmush o'rtog'i olamdan o'tgan bo'lib, uning qaramog'ida ikki nafar voyaga etmagan farzandi bor. Uning ro'zg'ori aynan maktabdagi oylik maoshi orqali kechadi. Bir nafar farzandi bor Nargiza Raximovaning ham holati deyarli shunday. Birgina futbol maktabidagi shifokor Raxmon Mavlonovning oylik maoshlaridan ushlab, soxta hujjatlar asosida moddiy tag'batlantirish pullarini chiqarib o'z manfaati uchun ishlatib yurgan direktor va hisobchi ularning maoshi kelganda insofga kirib qolishiga kim ishonadi. Taftishchi esa, farroshlarning oylik maoshlari to'g'ri berilganligini qonuniy o'rganish o'rniga, ularni ishdan bo'shatilishi to'g'risida gapirishi qanchalik qonunga to'g'ri keladi? “Revizor”ning asl maqsadi nima o'zi? 2016 yilning yoz faslida “Dinamo-plyus” PFK tasarrufidagi Bolalar va o'smirlar maxsus futbol sport maktabida kapital ta'mirlash ishlari amalga oshirilgan. Ushbu ta'mirlash ishlariga sal kam 60 million so'mdan ortiq mablag' sarflangan. “Revizor” esa odatdagidek bu holni ham ko'rishni istamagan? Balki revizorning ishini ham revizor qayta ko'rish kerakmikin? Voqealar rivojini kuzatishda davom etamiz. Farhod NORBO'TAEV 
— deya xabar beradi uff.uz nashri.