Evropa Chempionlar ligasi yarim final ilk bahsidan o'rin olgan «Monako» – «Yuventus» uchrashuvi o'z nihoyasiga etdi. Unda 0:2 hisobi qayd etilib, turinliklarning g'alabas bilan tugadi. Uchrashuv teng kurashlar ostida boshlandi. Ikki jamoa ham raqib darvozasi oldida bir nechta xavfli vaziyatlarni sodir etdilar. Biroq gol kiritish faqat mehmonlarga nasib qildi, uchrashuvning 29-daqiqasida «Yuventus» qarshi hujumdan unumli foydalandi: Dani Alves raqib jarima maydonchasiga yorib kirdi va oyog'ining orqa tomoni bilan Gonsalo Iguainga to'pni tashlab berdi, argentinalik hujumchi to'pni to'xtatib o'tirmay darvoza tomon zarba berdi va jamoasini oldinga olib chiqdi. Birinchi bo'limda boshqa gol kiritilmadi. «Monako» hujumchisi Kilian Mbappeda ikkita yaxshi imkoniyat bo'ldi, biroq tajribali Buffon yosh iqtidorning ikkala zarbasini ham bartaraf etishga erishdi. Mezbonlar ikkinchi bo'limni kutilganidek hujumkor ruhda boshladilar. «Yuve» esa asosan qarshi hujumda o'ynadi va raqib xato qilishini kutdi. Uchrashuvning 59-daqiqasi o'tib borayotgan bir vaqtda «Monako» vakili Bakayoko maydon markazida xatoga yo'l qo'ydi va «Keksa sinora» bundan unumli foydalandi. Dani Alves to'pni jarima maydonchasiga uzatib berdi, to'pga birinchi bo'lib Iguain etib keldi va o'yindagi ikkinchi golini kiritdi. Goldan keyin mehmonlar yana bir necha vaziyatlar yarata oldilar, biroq ulardan foydalana bilmadilar. Ikkinchi bo'lim o'rtalariga kelib, turinliklar o'yin tizginini «Monako»ga topshirdilar, biroq mezbonlarga omad kulib boqmadi. Uchrashuvning so'nggi daqiqalari nisbatan sokin kechdi, «Monako» hujumlarni oxiriga etkazishda oqsadi, mehmonlar esa himoyada deyarli bexato harakat qildilar. Ushbu g'alabadan so'ng «Yuventus» javob o'yini oldidan juda yaxshi imkoniyatga ega bo'lib oldi. Bu ikki klub o'rtasidagi javob uchrashuvi 9 may kuni Turinda bo'lib o'tadi. EChL. Yarim final, ilk uchrashuv Monako (Monako) – Yuventus (Italiya) 0:2  Gollar: 0:1 – 29 Iguain, 0:2 – 59 Iguain. Monako – Subashich, Glik, Sidibe, Fabino, Jemerson, Bakayoko (Moutinyu, 67), Bernardu Silva (Ture, 81), Lemar (Jermen, 67), Dirar, Mbappe, Falkao. Yuventus – Buffon, Bonuchchi, Kellini, Aleks Sandro, Bardzali, Pyanich (Lemina, 89), Markizio (Rinkon, 81), Dani Alves, Mandjukich, Iguain (Kuadrado, 77), Dibala. Ogohlantirishlar: Bonuchchi (21), Fabino (37), Markizio (58), Kellini (69).
— deya xabar beradi uff.uz nashri.