Shu paytgacha oilaviy sulolalar o'rtasida qandaydir xalqaro musobaqa yoki tanlov o'tkazilmagan. Lekin bundan buyog'iga shunday tadbirlar uyushtirilgan taqdirda, biz hikoya qilmoqchi bo'lganimiz - Zidanlar oilasi g'olib chiqishiga ishonchimiz komil. Zero, hozirda «Real»dek nomdor jamoaga ustozlik qilayotgan futbol afsonasining bir emas, naq to'rt nafar dilbandi aynan ota izidan borishga qaror qilishgan. Ta­biiy­ki, ular yosh bo'lganliklari bois, katta sahnaga ko'tarilib ulgurishmagan. Shu sababli sizlarni izbosar Zidanlar bilan tanishtirishni lozim topdik. Entso Zidan Fernandes Urugvaylik buyuk kasbdoshi - Entso Francheskoliga bo'lgan hurmatini Zayniddin Zidan o'zining to'ng'ich farzandiga uning ismini berish orqali izhor etdi. Entso hali 3 yoshga chiqib ulgurmay «Yuventus» maktabida shug'ullana boshladi va 2000 yilgacha o'sha erda tahsil oldi. Keyinchalik Frantsiya va Ispaniyadagi futbol maktablarida malaka oshirib, nihoyat «Real» tizimidan joy oldi. Mana, 13 yildirki, Entso Madridda futbol sirlarini o'rganish bilan mashg'ul. Zidanlar sulolasining to'n­g'ich vakili professional faoliyatini 2014 yili «Real»ning uchinchi jamoasida boshladi. Biroq to'rtinchi divizionda ishtirok etadigan bu jamoalar bir yildan so'ng tarqatib yuborildi. Keyinchalik Entso otasi boshqaruvidagi «Real Kastilya»ga o'tdi. Zayniddin farzandining o'z jamoasidagi faoliyatiga quyidagicha izoh bergandi: «Bu jamoaga o'tishi va muntazam maydonga tushishida mening aloqam yo'q. U o'z mehnati evaziga talab darajasida to'p surmoqda. To'g'ri, bu men uchun oson emasdi, lekin unga barcha futbolchilarga bo'lganidek munosabatda bo'lish uchun astoydil harakat qilyapman. Uyda albatta, o'g'limga aylanadi. Uning o'zi ham shuni istaydi. Ehtimol, unga nisbatan yanada talabchanroq bo'layotgandirman?! Uning hozirgidan ko'ra samaraliroq o'ynay olishini yaxshi bilaman». Entso Fernandes ikki mamlakat - Frantsiya hamda Ispaniya pasportiga ega. Vaqti kelib qaysi terma jamoa sharafini himoya qilish masalasi ko'tarilsa, tanlash huquqi o'g'lining ixtiyorida. Hozirda Entso «Real Kastilya» safida uchinchi ligada to'p surmoqda. Asosiy pozitsiyalari - so'l qanot va markaziy yarim himoya. Joriy mavsum 31 marta maydonga tushib, 5ta gol va shuncha samarali uzatmani amalga oshirdi. Mavsum arafasida futbolchini ijaraga olish uchun «Midlsbro» va Ispaniyaning bir qator klublari urinib ko'rishgandi. Lekin kelishuv amalga oshmay qoldi. Maydondagi harakatlari va natijalaridan xulosa chiqaradigan bo'lsak, Entsodagi jizzakilik Zayniddinni eslatadi: mavsum davomida olingan 7ta sariq va bitta qizil kartochka hujumkor yarim himoyachi uchun ko'plik qiladi. Aytgancha, buyuk afsonaning o'g'li ekanligi futbolchiga biroz xalaqit ham beradi. Uni shunchaki Entso Fernandes, deb chaqirishlarini yoqtiradi. 22 yoshli yarim himoyachi «Real»ning asosiy tarkibidagi debyutini 2016 yil 30 noyabrda Ispaniya kubogi doirasidagi «Kultural Leonesu» klubiga qarshi bahsda nishonladi. Entso tanaffusdan keyin Isko o'rniga maydonga tushdi va 18 daqiqadan so'ng Mariano Dias tomonidan uzatilgan to'pni golga aylantirdi. «Santyago Bernabeu»dagi uchrashuv «Qirollik klubi»ning 4:1 hisobidagi g'alabasi bilan yakunlandi. Lyuka Zidan DAVOMI InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.