«Nurafshon»ga qarshi bahsning ertasiga tiklanish mashg'ulotini o'tkazgan futbolchilarimizga bir kunlik dam berilgandi. Kuni-kecha yana jamoamiz a'zolari klub qarorgohida yig'ildi va navbatdagi bahsga hozirlik ko'rilmoqda. Eslatib o'tamiz birinchi liganing 9-turini «Andijon» safarda o'tkazadi.
Bu safargi raqibimiz - Farg'ona viloyatining «Yozyovon-Lochinlari» jamoasidir. Aytish kerakki, ushbu jamoaga Salimjon Zokirov va Lutfullo Haydarov boshchilik qilib kelmoqda. Jamoa ilk bor birinchi liga o'yinlarida 2015 yildan buyon ishtirok eta boshlagan. Shu bois bu jamoa “Andijon” bilan ilk bor rasmiy o'yinini o'tkazadi. Birinchi ligadagi debyut mavsumida jamoaning turnir jadvalidagi yakunda egallagan o'rni 8-o'rin bo'lgandi. O'sha kezlarda “Yozyovon-Lochinlari”ga dastlab Abdusamad Do'rmonov ikkinchi davradan boshlab esa yosh mutaxassis Islombek Ismoilov bosh murabbiylik qilgandi. Jamoa tarkibida asosan mahalliy futbolchilar o'ynab kelmoqda. Bu o'ziga xos an'anaga aylanib bormoqda. Hujumchi Bekzod Maxpraliev sermahsulligi bilan a'lohida ajralib turadi. Yozyovonliklar hozircha 6 ochko jamg'argan xolda, turnir jadvalida 15-o'rinni egallab turibdi.
11 may, payshanba kuni bo'lib o'tadigan o'yinni boshqarib boruvchi hakamlar aniq bo'ldi. Unga ko'ra mazkur bahsda toshkentlik hakamlar brigadasi ishlaydi.
«Yozyovon-Lochinlari» (Yozyovon) – «Andijon» (Andijon)
Bosh hakam: Akobirxo'ja Shukurullaev (Toshkent).
Qanot hakamlari: Oybek Kalaxo'jaev (Toshkent), Rahimbek Karimov (Toshkent).
Nazoratchi: Alisher Abdullaev (Toshkent)
— deya xabar beradi uff.uz nashri.