Evropa Chempionlar ligasi musoboqasining yarim final javob bahsidan o'rin olgan «Atletiko» Madrid – «Real» Madrid uchrashuvi o'z nihoyasiga etdi. Unda 2:1 hisobi qayd etilib, mezbonlarning g'alabasi bilan tugadi. Uchrashuv ikkala tomonning shiddatli harakatlari bilan boshlandi. Ayniqsa maydon egalarining ishtiyoqi juda baland bo'ldi. Natijada uchrashuvning 13-daqiqasidayoq hisob ochildi. Saul mezbonlarni oldinga olib chiqdi. Oradan uch daqiqa o'tib mazbonlarning hujumi raqib jarima maydonchasi ichida qo'pollik bilan to'xtatildi. Rafael Varan jarima maydoniga yorib kirgan Fernando Torresni yiqitdi va uchrashuv bosh hakami o'n bir metrlik nuqtani ko'rsatdi. Penaltini Antuan Grizmann aniq bajardi va o'yinga intrigani qaytargandek bo'ldi. Ushbu goldan so'ng «Atletiko» yana eski uslubiga qaytdi va himoyadan o'ynay boshladi. Birinchi bo'lim o'rtalari ketma-ket qo'polliklar va sariq kartochkalar bilan yodda qoldi. Bo'limning so'nggi daqiqalarida Karim Benzema chap qanotdan bir nechta raqiblarini aldab o'tib, to'pni Toni Kroosga tashlab berdi. Kroosning zarbasini Oblak qaytarishga erishdi, biroq qaytgan to'pni Isko darvozaga joylab qo'ydi va mehmonlarga katta ustunlik taqdim etdi. Ikkinchi bo'lim birinchisiga nisbatan sokin boshlandi va o'yin asosan maydon markazida kechdi. Uchrashuvning 66-daqiqasida mezbonlarda yaxshi imkoniyat bo'ldi, biroq Keylor Navas darvozaga berilgan ikkita zarbani ham qaytarishga erishdi. Shu tariqa ikki o'yin natijasiga ko'ra «Real» finalga yo'l oladigan bo'ldi. Endi Kardiffda «Real» va «Yuventus» qarama-qarshiligi guvohi bo'lamiz. EChL Yarim final, Javob o'yini Atletiko (Ispaniya) – Real Madrid (Ispaniya) 2:1  Gollar: 1:0 – 12 Saul, 2:0 – 16, penalti Grizmann, 2:1 – 42 Isko. Atletiko – Oblak, Savich, Godin, Filipe Luis, Ximenes (Parti, 57), Saul, Ferreyra Karrasko, Gabi, Koke (Korrea, 76), Grizmann, Torres (Gameyro, 56). Real Madrid – Navas, Varan, Marselo, Danilo, Ramos, Modrich, Kazemiro (Vaskes, 77), Kroos, Isko, Ronaldu, Benzema (Asensio, 77). Ogohlantirishlar: Danilo (4), Savich (6), Godin (34), Ramos (34), Gabi (37), Korrea (85). Ilk uchrashuv: 0:3
— deya xabar beradi uff.uz nashri.