Avval xabar berganimizdek, mamlakatimizga O'zbekiston velosiped sporti Federatsiyasi taklifiga binoan Osiyo Velosport Konfederatsiyasi (ASS) Prezidenti Osama Axmad Al Shafar tashrif buyurgan edi.
Bugun O'zbekiston Milliy olimpiya qo'mitasida martabali mehmon va O'zbekiston Respublikasi Bosh vaziri o'rinbosari, O'zbekiston velosiped sporti Federatsiyasi raisi Tanzila Narbaeva, O'zbekiston Milliy olimpiya qo'mitasi vitse-prezidenti Umid Ahmadjonov hamda O'zbekiston velosiped sporti Federatsiyasi mas'ullari ishtirokida tashrif dasturida belgilangan uchrashuv bo'lib o'tdi.
Uchrashuv davomida O'zbekiston Respublikasi tomonidan sportni keng miqyosda rivojlantirish, shuningdek, velosiped sportini yanada ommaviylashtirish borasida ko'plab ishlar olib borilayotgani aytib o'tildi. Joriy yilning fevral oyida O'zbekiston velosiped sporti Federatsiyasining hisobot-saylov Konferentsiyasida Federatsiya rahbariyatida o'zgarish amalga oshirilib, yangi rahbarlar saylanishgandi.
Hozirda Federatsiya faoliyatini yanada rivojlantirish, Osiyo va Jahon miqyosidagi aloqalarni tiklash yuzasidan qator ishlar amalga oshirildi. O'z navbatida janob Al-Shafar O'zbekistonda Velosportning potentsiali yuqoriligini qayd etib, o'zbek sportchilari mintaqada etakchilardan ekanliklarini ta'kidladi.
Bugungi muzokaralar davomida Birlashgan Arab Amirliklari (BAA) hamda O'zbekiston velosportchilari o'rtasida ikki tomonlama o'quv mashg'ulot yig'inlari o'tkazish, terma jamoamiz a'zolarining mahoratini oshirish maqsadida BAAda malaka oshirishlarini ta'minlash, ikki mamlakat sportchilari va murabbiylari o'rtasida tajriba almashishni yo'lga qo'yish kabi masalalar ko'rildi. Bundan tashqari uchrashuv davomida mamlakatimizda qish hukmnronlik qiladigan fasllarda BAAda, yilning iliq kunlarida esa O'zbekiston Respublikasida mashg'ulotlar o'tkazish yuzasidan bir qator takliflar ko'rib chiqildi.  
Kun tartibidagi ikkinchi masala bo'yicha 2018 yilda O'zbekiston Respublikasida Mintaqaviy veloklub (kontinental jamoa) ochish, uning moddiy-texnik bazasini shakllantirishda bevosita Osiyo velosport Konfedratsiyasi tomonidan qo'llab-quvvatlash masalasi bo'yicha muzokara olib borildi. Shuningdek, O'zbekiston Respublikasi xududida 2019 yilda velosportning shosse yo'nalishida Osiyo chempionatini o'tkazish masalasi ham ko'rib chiqildi. Muhokama davomida O'zbekistonda ushbu musobaqani o'tkazish uchun barcha sharoitlar mavjudligi qayd etildi. Ushbu masala bo'yicha yakuniy qaror yaqin vaqt ichida ma'lum qilinadi.
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.