Ertadan Oliy Ligada 11-tur uchrashuvlariga start beriladi. Mazkur tur doirasidagi anchagina qiziqarli ko'rinish olishi kutilayotgan bellashuvlardan biri Qo'qon shahrida bo'lib o'tadi. Unda ayni paytda musobaqa jadvalining dastlabki ikki pog'onasini band etib turgan jamoalar – “Lokomotiv” hamda “Qo'qon-1912” jamoalari o'zaro bahs olib borishadi. Ta'kidlash joizki, mazkur jamoalar milliy chempionatimiz doirasida shu paytga qadar 4 marta o'zaro to'qnash kelishgan. Natijalar borasidagi ustunlik esa “temiryo'lchilar” jamoasi tomonida. Ushbu ikki jamoaning dastlabki qarama-qarshiligida “Loko” 1:0 hisobida g'alabaga erishgan. “Qo'qon-1912” maydonida o'tgan bitta bellashuvda 2:2 hisobi qayd etilgan bo'lsa, yana bir bahsda esa toshkentliklar 3:1 hisobida zafar quchishgan. Oliy Liganing o'tgan yilgi mavsumi doirasida Toshkentda kechgan o'yin esa 4:0 hisobida “Lokomotiv” foydasiga hal bo'lgan va mazkur o'yin ushbu ikki jamoa o'zaro qarama-qarshiliklari doirasida eng yirik g'alabamiz bo'lib turibdi. Oliy Liga, 11-tur. 17 may, chorshanba. (17:30) “Qo'qon-1912” (Qo'qon) – “Lokomotiv” (Toshkent) Hakamlar: V. Tseytlin (Toshkent), A. Snetkov (Toshkent vil.), A. Kalinin (Qarshi), A. Shukurullaev (Toshkent) Nazoratchi: A. Arutyunov (Toshkent) PFL vakili: B. Mametov Joriy yilgi mavsumni “Qo'qon-1912” jamoasi ham ancha ko'tarinki ruhda o'tkazmoqda. Qo'qonliklar hozirda 10 ta uchrashuvda 19 ochko jamg'argancha musobaqa jadvalining ikkinchi o'rnini band etib turishibdi. “Temiryo'lchilar” jamoasi esa 9 ta match yakunlariga ko'ra 22 ochko to'plashgan hamda jamoamiz Oliy Ligada peshqadamlik qilmoqda. Raqib safida o'tkazilayotgan uchrashuvlarda mazmunli o'yin namoyish etib, muxlislar olqishiga sazovor bo'layotgan futbolchilar – Filip Rayevats (5 ta gol), Suhrob Berdiev (4 ta gol) hamda Nosirbek Otaqo'ziev (3 ta gol) bo'lib turishibdi. “Lokomotiv” tarkibida esa Marat Bikmaev 10 ta gol kiritib, to'purarlar bahsida etakchilik qilayotgan bo'lsa, shuningdek, Jaloliddin Masharipov 5 ta gol hamda Sardor Mirzaev 3 ta gol kiritib, futbol jamoatchiligi diqqat markazida bo'lib turishibdi. Ta'kidlash joizki, uchrashuv soat 17:30da start oladi. Uni Vladislav Tseytlin boshchiligidagi hakamlar guruhi boshqarib boradi.
— deya xabar beradi uff.uz nashri.